Kommunekassen var tom – då punga næringslivet ut 45 millionar til badeland

– Vi har brukt ei og ei halv veke på å få på plass desse midlane, det er heilt formidabelt, seier Sverre Søraa.

Forretningsmannen har leia arbeidet med å samle inn pengar til det som skal bli eit storstila nytt badeanlegg i Måløy. Kommunen ynskjer seg eit badeland til 150 millionar kroner, men mangla pengar.

Anlegget har fått namnet Nordfjordbadet og skal løfte lokalsamfunnet. Seinare kan det kome hotell og kulturhus på tomta. Store deler av sentrum har elles vore prega av kaiområder og industribygg.

– Næringslivet skal rekruttere dei beste i framtida, då er trivsel viktig, seier Søraa.

I alt er det 21 verksemder som har sikra pengane, i tillegg kjem banklån på 10 millionar kroner.

– Vi har gitt ei fullfinansiering på 45 millionar kroner. Ein gåvedel på 10 millionar, og ein direkte innskoten kapital på 35 millionar kroner.

Lokalsamfunnet bidreg

Fleire stader har næringslivet redda prosjekt når kommunen ikkje har strekt til. I Bergen har til dømes byens rikaste mann, Trond Mohn, finansierte ei rekke idrettsanlegg. Og i Florø får dei no ein ny storhall, takka vare lokalsamfunnet.

Der gav Fjord Base nyleg 10 millionar kroner, som var beløpet dei mangla for å få realisert hallen.

– Det var ein ufatteleg flott gest, og heilt avgjerande for at vi skulle få det til, seier leiar for innsamlinga til storhallen i Florø, Bente Frøyen Steindal.

Også andre mindre bedrifter i det lokale næringslivet bidrog med ulike summar.

– Vi er veldig takknemlege for alle bidraga. Det betyr mykje for heile byen, seier ho.

Ekstra tippemidlar

Ordførar i Vågsøy, Kristin Maurstad, seier det hasta å sende søknad om statlege tippemidlar til Nordfjordbadet, fordi ein då rekk status som interkommunalt anlegg saman med Flora. Det betyr 8 millionar kroner ekstra til badet.

Seinare kan ein ikkje søkje om desse pengane fordi Flora og Vågsøy skal slå seg saman frå nyttår.

– Av og til må ein hive seg rundt, seier Maurstad.

Planar om hotell og kulturhus

Sverre Søraa har sjølv gått inn med store summar. Søraa eig nær halvparten av Coast Seafood som omset for nær 4,3 milliardar kroner og i fjor gjekk med vel 100 millionar i overskot. Han eig også halvparten av tomta der næringslivet vil ha bassenget.

– Coast har gått inn med 10 millionar kroner, personleg har eg putta på ein million, men dette handlar om at alle saman er med og bidrar, til saman blir vi vanvitig sterke seier Søraa.