– Dette er skuffande

Ein av dei som tykkjer det er trasig at det ikkje blir noko av hendinga, er Torbjørn Vereide frå Arbeidarpartiet / AUF.

– Det er skuffande, og er skuffa over kommunane som ikkje har vore aktive nok i å få aktivitert dei unge til å bli med på fylkesting for ungdom, seier Vereide til NRK.

Det er Ungdomspolitisk utval (UPU) som i samråd med fylkesordføraren har bestemt at fylkestinget for ungdom vert avlyst på grunn av for få påmelde. Sitjande UPU held fram arbeidet sitt eitt år til.

For få melde seg på

– Ungdomsråd frå ti av 26 kommunar, berre tre politiske ungdomsorganisasjonar og to barne- og ungdomsorganisasjonar hadde meldt seg på då påmeldingsfristen gjekk ut, opplyser fylkeskommunen i ei pressemelding.

UPU bestemde i eit møte tidlegare i oktober at ungdomsråd frå minst halvparten av kommunane i fylket burde vere med for å gjennomføre fylkestinget for ungdom. Difor har dei no – i samråd med fylkesordføraren – vedteke å avlyse ungdomstinget.

• LES OGSÅ: Svært kritisk til Melodi Grand Prix-pengar

– Må ta ansvar

Tidlegare ungdomsordførar i Flora, Erlend Bøe (H), meiner at politikarane i kommunane må ta ansvar for å få fylkesting for ungdom på beina att.

– Problemet er at partipolitikarane rundt om i kommunane er meir opptekne av å fronte ungdomar i eige parti fremfor ungdomar i eigen kommune, det er svært synd, meiner Bøe.

Held fram eitt år til

Det sitjande UPU held fram arbeidet eitt år til. Dei vil i samråd med ungdom, ordførarar i kommunane og det politiske miljøet diskutere kva form ungdomsmedverknad skal ha her i fylket.

– Dei vil også diskutere om fylkestinget for ungdom skal halde fram i si noverande form, eller om ein skal finne andre høvelege måtar for ungdomsmedverknad, heiter det i meldinga frå fylkeskommunen.

Fylkesordførar Åshild Kjelsnes (Ap) synes det er trist og veldig leitt at ein no mått gå til det steget og avlyse fylkesting for ungdom.