Det er hektiske dagar for bøndene i Eid – og for så vidt i resten av fylket. Like før helga kom dei første bøndene i gang med slåtten.
Hos Hjalma samdrift på Haugen er 10–12 maskiner godt i gang med slåtten.
– Det er mykje arbeid, men dette er kremen med det å vere bonde. Når du får slike avlingar, så flott fôr, så fint vêr og slike forhold å få det inn under. Det er eit eventyr, strålar Bjørn Haugland.
60 mjølkekyr
ROSA: – Det er greitt med litt forandring i kvardagen, og så støttar du ei god sak, seier Ole Kristian Aasen om dei rosa rundballane.
Foto: Harald KolsethTraktorar, hjullastarar, fôrhaustarar og det som trengst av utstyr går for tida i eitt for å hauste inn fôr til dei kring 60 mjølkekyrne i samdrifta.
– Ei kyr et kring 50–60 kilo for dagen, og gangar du det med 365 dagar så får du kor mykje grovfôr ei kyr treng for året, humrar Haugland – vel vitande om at reknestykket gir kring 20 tonn til svar.
Og forholda siste dagane har vore perfekte til den slags arbeid. Då veit også sommarkledde bønder å nytte tida.
Mange lange dagar
– Det er ikkje gale slike dagar, med fint vêr og når alt fungerer. Men det blir lange dagar. Når du først byrjar å slå, så blir det frå 08 til 23, seier Vidar Haugland.
Med det sommarvêret som har vore siste veka får fôret endåtil tørke før det blir jamna og pressa saman i plansiloen.
- Les også: Rosa ballar mot brystkreft
– Det er kjempeviktig i dette. Vi likar ikkje å køyre etter vatnet, smiler Haugland og konstaterer at graset har fått gode vekstkår siste veka.
– Vatnet kom førre helg, så kom tørken slik at det vart ferdig fort, seier han.
– Det har ikkje vakse for fort?
– Det blir spennande å sjå kva fôrkvaliteten er, men det ser bra ut no.
