Árat dán čavčča ilmmai Guovdageainnu stuimmit-filbma DVDan, ja dál lea ges filmma musihkka ilbman CDan.
Mari Boine, Svein Schultz ja Herman Rundberg leat ferten bargat musihkain vai heive almmuhuvvot cd-hámis. Cdas leat njeallje bihttá. Ja bihtát leat guhkit, go juohke bihttá bistá badjel 10 minuvtta.
Musihka bokte oaidná filmma
Jus lea oaidnán filmma, ja de guldala dán cd, de dovdá daid musihkaid ahte gokko sullii dat ledje filmmas.
Earenoamážit bihttá "Deaivvideapmi" lea garas. Orru dego oaidnime govaid Nils Gaup filmmas movt lei go stuimmit álge. "Doaivut ja vuoimmehuvvat" lea ges nubbi bihttá mii čuohcá dovdduide. Mari Boine lávlu morašjienain, ja olmmoš dego oaidná movt olbmot leat vuollánan.
-Dán musihka heive gullat dalle go háliida vuoiŋŋastit dahje mediteret. Go háliida vajálduhttit buot mii lea birrasis, dego mannat adjágas-dillái, lohká Mari Boine.
Noavki lea čuojanas
Go geahččá girjjáža mas muitaluvvo geat leat čuojahan musihka, de fuomáša ahte Mari Boine lea noavke-čuojaheaddji. -Noavkkis lea earenoamáš jietna, ja dán jiena geavaheimmet maiddái "Idjagieđas" cdas, muitala Boine.
Neavttárat koaras
Namuhanveara lea ahte neavttárat Inga Juuso, Mary Sarre ja Anitta Suikkari gullojit koaras dán cdas. Inga Juuso lei neavttárin filmmas, ja Sarre ja Suikkari leaba ges mielde teáhterbihtás seamma stuimmiid birra.
