– Lean hirpmástuvvan ja in ge lean eisege vuordán oažžut dán bálkkašumi, lohká Isokoski.
Áillohaš-bálkkašupmi almmuhuvvo jahkásaččat Sámi Grand Prix doaluid oktavuođas.
Norgga Sámiid riikkasearvi, Guovdageainnu suohkan ja Guovdageainnu Sámiid searvi leat ásahan Áillohaš-musihkkabálkkašumi, mii guoddá sámi multidáiddára Nils Aslak Valkeapää - Áillohačča nama.
Dievva musihkkaprušeavttat
Isokoski lea musihkkabuvttadeaddji ja jođiha earret eará Tuupa Records skearrofitnodaga.
Son ii astta gal guhkká ávvudit bálkkašumi maid ikte oaččui.
– Boahtte vahkus álggán juo ráhkadit dán jagáš Sámi Grand Prix skearru ja fargga ilbmá maid Inga Maret Gaup Juuso CD, lohká Isokoski.
Seammás lea son maid bargamen ođđa sámi pop ja rock musihkain nuorra sámi artisttaiguin nugo SomBy, Ailo Valle, Amoc, Irton, Ulla Pirttijarvi ja Vilddas.
– Mearkkašan olu sámi musihkkii
Áillohaš-bálkkašumi jury čilge ahte Isokoski lea bargan olu sámemusihka ovddas ja erenoamažit ovddidan nuorra sámi artisttaid.
Vuoiti lea giitevaš go earát atnet árvvus su ja su fitnodaga barggu.
– Lea stuorra gudni oažžut bálkkašumi ja lea illudahtti go earát oidnet makkár barggu mii bargat, lohká Isokoski.
Diibmá vuittii lávlu Sofia Jannok Áillohaš-bálkkašumi. Vuosttaš vuoiti 1993 lei ges Mari Boine.
GULDAL: