– Stuorra illu go logi olbmo leat čađahan ubmisámegiellakurssa Ruoŧas. Dát movttiidahttá maiddái sin geat Norggas dál geahččalit oahppat giela, lohká Jørn Magnus Rivojen.

Son jođiha ubmisámi fierpmádaga Hemnesas Nordlánddas.

Kursa bisttii 3 jagi, ja Sámij åhpadusguovdátjis / Sámi oahpahusguovddáš Jåhkåmåhkes dat lágidii kurssa.

Ubmisámegiella lea okta daid eanemus áitojuvvon sámegielain, maid hui moattis hállet. Ruoŧas leat veahá eanet olbmot geat máhttet dán giela, muhto dilli lea maiddái buorráneamen Norggas, oaivvilda Rivojen.

– Mon dieđán ahte leat moattis geat maid geavahit giela beaivválaččat Norggas. Eat leat vuos nu ollugat, muhto lea goit illudahtti go lohku gulul lassána, lohká son.

Rivojen lea ieš ráhkadeamen ubmisámegiel grámmatihkka girjji ovttasráđiid eará ubmisámiin Ruoŧa beale Sámis. Vejolaččat gollet vel lagabuid golbma jagi ovdalgo girji gárvána.

– Sii dárbbašit oahpponeavvuid go olbmot háliidit giela oahppat, lohká Rivojen.

Ovdalaččas lea maid ruoŧa beale sápmelaš, Henrik Barruk, ráhkadan ubmisámegiel sátnegirji. Les nyhetsmeldingen på norsk.