– Giellaoahppu lea boktán erenoamáš dovdduid. Lea sihke moraš ja illu go lean beassan áddjá eatnigiela oahppat, lohká Helena Isaksson (63).

Son lea gieskat čađahan ubmisámegiellakurssa, mii bisttii 3 jagi.

Sii ledje logis geat čađahedje kurssa, maid Sámij åhpadusguovdátjis / Sámi oahpahusguovddáš Jåhkåmåhkes lea lágidan.

Ubmisámegiella lea Unesco áitojuvvon gielaid listtus, ja sihke Ruoŧa ja Norgga bealde áŋgiruššet seailluhit giela.

Simon Forsmark lea maid okta sis gii lea váldán dán oahpu. Son lea ilus go lea beassan oahppat iežas máttuid giela, ja háliida geavahit giela beaivválaččat. Sus eai leat dál earát lagaš bearrašis geat hállet ubmisámegiela.

– Dát oahppu lea oassi das ahte váldit ruovttoluotta oasi bearraša historjjás, ja de fievrredit dan viidáseappot, lohká Forsmark.

Sámediggeráđđelahttu Mikkel Eskil Mikkelsen illuda sakka go gullá man ollugat leat čađahan ubmisámegiellakurssa.

– Logi ođđa olbmo geat hállet ubmisámegiela lea erenoamáš stuorra lassáneapmi, lohká son.

Norgga beale ubmisámi fierpmádaga njunuš Hemnesas Nordlánddas, Jørn Rivojen, lea maid ilus go nie olu lasi olbmo dál hállagohtet ubmisámegiela.

– Dát movttiidahttá maiddái sin geat Norggas dál geahččalit oahppat giela, lohká Jørn Magnus Rivojen.

Ii gávdno dárkilis statistihkka das man ollugat hállet ieš guđet ge sámegielaid, muhto ráđđehusa dieđuid mielde leat áibba moattis geat dál hállet dán giela Norggas. Ruoŧa beale Sámis lea dilli veahá buoret. Loga eambbo dán birra dárogillii min neahttasiiddus. Loga maid dán birra ubmisámegillii SVT Sámi neahttasiiddus.