Luhkkár Máhte Máhtte, Matti Aikio ásai Mátta Norggas, Kristianias. Son lei riegádan Kárášjogas geassemánu 18. beaivvi 1872:s, ja jámii 1929s suoidnemánu 25. beaivvi.
Else Márjjá áddjá lei Matti Aikio nuoramus viellja
Else Márjjá Isaksena áddjá lei Matti Aikio nuoramus viellja. Ja soai leigga dološ beakkána Luhkkára, Mathis Isaksena, bártnit. Ja Luhkkár lei Else Márjjá Isaksena máttaráddjá. Go Else Márjá Isaksen vuos lei gullan iežas adjá stuorra vielljas, Matti Aikios, ahte son lei beakkánis girječálli ja dáiddár Mátta Norggas, na de gal ohcagođii son sus eanet dieđuid.
Matti Aikio čálii gávci romána ja ollu noveallaid
Su vuosttaš girjiis Kong Akab, das čállá Aikio sápmelaččain, ja girjji váldopersovdna leage sápmálaš. Iežas sámi duogážis gal Matti Aikio ii goassige muitalan, dat lei čiegus ášši. Nuppi girjjis «I dyreskinn» das ges lea sámebárdni Juššá váldopersovdna. Jussá lohká báhppaohppui jos det mat dohkkešii rivgui gean namma lea Elna. Ii Jussá lihkostuva dienna rivgoniedaáššiin, muhto son fitne báhppavirggi Suomas.
Matti Aikio namma lei rievttimielde Mathis Isaksen, danne čuožžu su vuosttas girjjis ahte čálli lea Mathias Isachsen Aikio. Maŋŋelis lea su namma dušše Matti Aikio.
Son lei máŋggabealat dáiddár
Matti Aikio šattai dovddusin máddin, go doppe lei son girječálli, journalistta ja dáiddár. Son čálii sihke románaid, noveallaid ja ártihkkaliid. Son lea maid sárgun govaid, čuohppan govaid ja ráhkadan bácciid. De son lei máŋggabealat dáiddár.