Startar full gjennomgang av gigantisk vegprosjekt

– Vi må snu alle steinar for å få prosjektet ned i pris, seier avdelingsdirektør Gyda Grendstad i Vegdirektoratet.

Rogfast skal sørge for ferjefritt vegsamband under Boknafjorden, og ligg an til å bli Noregs største vegprosjekt nokosinne. No varslar Vegdirektoratet full gjennomgang av prosjektet.

Dette kjem etter at Statens vegvesen i haust avlyste den såkalla Kvitsøy-kontrakten i prosjektet, fordi det låg an til ein kostnadssprekk på éin milliard kroner.

Kvitsøy-kontrakten skal kople øykommunen Kvitsøy til Rogfast, men etter ei anbodsrunde stod berre to tilbydarar igjen. Begge opererte med ein pris langt over Vegvesenet sine utrekningar.

No kan nettopp Kvitsøy-kontrakten bli gjenstand for ny vurdering.

– Det er ein del fordelar med Kvitsøy-armen, men han utgjer òg ein stor kostnad. Vi må finne ut om han i det heile skal vere der, og om han skal vere der i den noverande forma, seier Grendstad.

• LES ÒG: Slik kan verdens lengste undersjøiske veitunnel se ut

Frykter prosjektet blir skrinlagt

Men Vegdirektoratet stoppar ikkje ved Kvitsøy-armen. Dei stadfestar at dei har lyst ut anbod på ny vurdering av heile Rogfast-prosjektet.

– I denne runden ser vi på alle store og dyre prosjekt, for å vere sikre på at vi har valt riktig løysing, seier Grendstad.

Den nye vendinga til direktoratet møter motstand blant Rogfast-tilhengarane. Dei fryktar for framtida til heile prosjektet.

– Eg synest dette er ein utidig omkamp. Ein har brukt meir enn 15 år på å planlegge Rogfast, no er det på tide å gå framover, seier næringspolitisk leiar Tormod Andreassen i Næringsforeningen i Stavanger-regionen.

Andreassen understrekar at han ikkje er imot å analysere pris og finansiering av prosjektet, og at ny teknologi kan bidra til å senke den samla prisen.

– Men på eit tidspunkt må ein setje ein strek og seie «vi har faktisk bestemt oss», seier han.

Sjefen føler seg trygg på Rogfast

Rogfast har vorte kritisert for å vere eit altfor dyrt samferdsleprosjekt. Blant kritikarane er Miljøpartiet Dei Grøne, som vil byte ut kostbar vegbygging med satsing på kollektivtilbod og sykkel- og gangvegar.

Leiar for Rogfast i Statens vegvesen, Gunnar Eiterjord, er på si side trygg på at det gigantiske vegprosjektet blir noko av.

Han er i full gong med å kutte kostnader for at prosjektet skal halde seg innanfor budsjettrammene.

– Mykje kan kuttast. Vi kan mellom anna lage litt brattare stigning på armen opp til Kvitsøy, og lage litt smalare tunnelprofil. Det er masse små detaljar som i sum kan utgjere ganske mykje pengar, seier Eiterjord.

Han fredar samtidig Kvitsøy-sambandet.

– Førebels er vurderinga vår at Kvitsøy-armen er bra og fornuftig å behalde.

• LES ÒG: Sjå den første Rogfast-salven bli avfyrt