– Der har generelt vore mykje rus og mykje slåsting. Folk har urinert og kasta opp i politibilar og taxiar, seier Brit Randulf, operasjonsleiar hjå Politiet Sør-Vest.
22:42 i Stavanger vart ei vakt på ein utestad i Stavanger slått i magen. Den mistenkte, ein mann i byrjinga av 20-åra, vart meld til politiet.
Halv tolv kjem politiet til ei adresse i Kopervik på Karmøy. Det er meld om krangling eller slagsmål mellom to vaksne. Den eine personen var full og vart køyrd i arresten for avrusing.
I Hå vart det meld om eit slagsmål på Sirevåg litt over midnatt. Ein person skal vere skadd som følgje av det. Ambulansepersonell såg til personen på staden, men hen ynskja ikkje å melde hendinga.
Den skadde personen antok at han sjølv hadde vore «like god», skriv politiet på Twitter.
Litt før halv eitt vart det meld om eit trafikkuhell i Sokndal. Tre personar vart tekne til sjukehuset i Stavanger, men såg ut til å vere oppegåande. Førar av bilen sa at bilen hadde fått vassplaning før uhellet skjedde.
Fem over halv eitt vart det meldt om ein mann i Hå som gjekk og sparka i bilar på Nærbø. Mannen i 30-åra vart teken til arresten for avrusing av politiet.
00:41 køyrde ein bil seg fast i eit kryss på Randaberg. Politiet kom til staden og fekk kontakt med føraren, ein mann i byrjinga av 30-åra. Mannen såg ut til å vere rusa, og vart teken til legevakta for å ta blodprøve.
00:43 melder politiet at ei dørvakt på ein utestad i Stavanger hadde «mista sans og samling» og utøvd vald mot to gjestar. Politiet har oppretta sak etter hendinga.
Litt før eitt vart det meld om eit slagsmål ved ein utestad i Sandnes sentrum. Ingen personar vart skadd, men båe partar vart meldte og synt vekk frå sentrum.
Kvart på to var det nok eit slagsmål på ein utestad i Stavanger sentrum. Ein person skal ha mista medvitet. Det skal ha vore amper stemning også etter politiet kom til staden.
Den eine personen vart teken med i ambulansen med hevelsar i andletet. Båe partar vart meld og sak vart oppretta.
Ein 18-årig mann vart plukka opp av ein patrulje i Haugesund då han låg og kava på bakken. Mannen skal ha vore ute av stand til å ta vare på seg sjølv, og vart teken med til arresten for avrusing.
I Sauda kvart over to meldte politiet om ein naken mann som sprang rundt i vegbana ved Trædavika.
Mannen, i byrjinga av 20-åra, var rusa og vart teken med til arresten. Politiet informerer om at dei ikkje veit kvifor mannen var naken.
Halv tre vart det igjen slagsmål, denne gong i Haugesund utanfor ein utestad på Indre kai. To menn i byrjinga av 20-åra vart meld til politiet. Båe to skal ha blitt skadd, men hadde ikkje behov for helsehjelp.
03:20 vart fleire personar slegne ned utanfor ein utestad i Kopervik på Karmøy. Ein av dei, ein ung gut i slutten av tenåra, skal ha mista medvitet og vart sett til av ambulanse på staden. Han vart seinare lagt inn på sjukehus.
Politiet har enno ikkje full oversikt over hendinga i Kopervik.
I tillegg til alt dette har politiet hatt «ein god del» hendingar med uro, stort sett i Stavanger. Nokre fleire har blitt sett i arresten for avrusing, og stort sett alle hendingane var alkoholrelaterte.
