I halv åtte tida måndag morgon fekk politiet inn ei melding om at ein bil og ein moped hadde krasja i krysset mellom Sola Prestegårdsvei og Tanangervegen ved flyplassen i Sola.
– Mopedføraren skal ha fått skadar, og er frakta til sjukehus. Han var allereie i ambulansen då politiet kom til staden, seier operasjonsleiar i Rogaland politidistrikt Frank Roland til NRK.no.
Klokka 10.30 opplyser Stavanger universitetssjukehus at mopedføraren er ein mann i 30-åra, og han ligg inne med alvorlege skadar.
Store trafikkproblem
Ulukka har ført til store trafikkproblem mellom Sola flyplass og Tananger i rushtrafikken. Fleire innringarar fortel om stilleståande køar.
– Me oppfordrar bilførarar til å finna alternative vegar, seier Roland.
Politiet kjenner ikkje årsaka til ulukka, men slår fast at det er svært glatt, og understrekar at det er viktig å køyra varsamt.
– Begge kom køyrande på riksvegen. Då bilen skulle svinga inn i Prestegårdsveien kom mopeden imot, og køyrde inn i bilen.
Tanangervegen blei opna for trafikk etter ulukka klokka 08.30.
- Les òg: – Svært glatte vegar i Rogaland
