Skjær i sjøen for «Draken» – må bryta seglas

Det var i april verdas største vikingskip, som blei bygd på Karmøy, sette ut frå Vibrandsøy for å kryssa Atlanterhavet i fotspora til Leiv Eiriksson. Dei har kome fram til Amerika, men i ei pressemelding skriv mannskapet om den fortvila situasjonen dei nå har kome i.

• Les òg: Draken skal gjenerobre Amerika
• Les òg: Norsk vikingskip har nådd Nord-Amerika

Skyhøge losprisar

Dei blei invitert med på seglasen Tall Ships Challenge Great Lakes 2016, men så viser det seg at dette inneber at dei må ha los om bord på skipet, og at dette vil kosta 400 amerikanske dollar i timen.

Gjennom heile seglasen vil summen koma opp i om lag 3.5 millionar kroner med dagens kurs. Dette er ifølgje mannskapet vanlege kommersielle losprisar.

– Dette er ein urimeleg pris for eit ikkje-kommersielt skip som har til intensjon å spreia kunnskap om Vikingane sine sjøferdigheiter, skriv mellom anna Sigurd Aase frå Haugesund i pressemeldinga. Det er han som eig båten.

Dermed må «Draken» bryta seglasen, og mest truleg reisa vekk frå Dei store sjøar.