Dette verktøyet skal finna stolne syklar

Det er i alle fall håpet til gründer Ole Martin Ølmheim (23) frå Stavanger.

Han har fått etablerartilskot frå Innovasjon Norge og får i tillegg profesjonelle gründer-råd frå Jæren produktvikling til å få ferdigstilt forretningsplanane han har i lag med eit par studiekameratar.

Oppfinninga går ut på å gøyma ein GPS-komponent inne i ramma på sykkelen. Ved hjelp av GSM-nettet (mobilnettet) sender den posisjonen vidare til ein pc eller mobiltelefon.

• LES OGSÅ: Fant 40 stjålne sykler i skogen
• LES OGSÅ: Gode tider for sykkeltyvene

Kan finna syklar både inne og ute

Fordelen er at eininga kan finna posisjonen i område der det ikkje er GPS-dekning, men den vil ikkje fungera utan telefondekning.

– Dette gjer at våre kundar kan finna igjen stolne syklar via ein pc eller app. Systemet gjer at folk kan finna igjen syklane like lett inne i hus som ute i det fri, seier Ølmheim.

Oppfinninga er svært aktuell. I alle fall om ein ser på statistikken frå politiet som viser at talet på sykkeltjuveri aukar kraftig i Rogaland politidistrikt.

Første halvår i år var det over 30 prosent fleire sykkeltjuveri samanlikna med same periode i fjor.

• LES OGSÅ: Slik kan du sikre deg mot kjøp av tyvegods
• LES OGSÅ: Slik unngår du sykkeltjuveri

Fleire utfordringar

Men fleire har prøvd seg på sporingsverktøy for syklar før. Dagleg leiar i Falck sykkelregister, Geir Kamsvåg, peikar på fleire utfordringar.

– Det eine er levetida på batteria som ein treng for å senda ut signala. Det andre er at batteria og komponenten skal tola det tøffe klimaet i landet vårt, og det tredje er korleis ein skal klara å senda signala gjennom rammene på syklane, seier han.

Men dersom ein klarer å løysa desse utfordringane vil sporingsverktøy som dette vera veldig bra for å finna stolne syklar, ifølge Kamsvåg.

Håpar å vera klar til julehandelen

Den 23 år gamle studenten og gründeren frå Stavanger seier ambisjonane er å ha ei batterilevetid som gjer at du berre treng å lada komponenten ein gong i månaden, og at dei har testa ut signalutfordringane.

– Per dags dato har me til gode å finna ein plass der det ikkje er gode signal. Då skal du veldig langt opp på fjellet, seier han.

Går alt etter planen er sporingsverktøyet klart i midten av november, slik at produktet er klart for julesalet.