Nyskapinga Haugesundnytt, som er ei gratisavis, og TV Haugaland skal tilsette totalt fem journalistar i nye stillingar denne hausten.
Det er uvanleg i ei tid der dei fleste mediehus slit i motvind og må nedbemanna.
– Nå er førebuingane intense til den første utgåve i januar, seier ansvarleg redaktør Øystein Merkesvik i Haugesundnytt.
Etter suksess med gratisavisa Karmøynytt og nettsida karmøynytt.no, satsar grundarane bak nå på å gjenta oppturen i Haugesund.
Målet er gratisavis kvar onsdag og eiga nettside.
– Når folk får avisa gratis, les dei. Rykta om avisdøden meiner me er betydeleg overdriven, seier Merkesvik.
- LES OGSÅ:
Må ha annonseinntekter
Han viser til undersøkingar som viser at folk vil ha papiraviser når dei får det gratis og at dette gjeld folk i alle aldersgrupper.
Haugesundnytt søker nå etter ein redaksjonsleiar og to journalistar, i tillegg til eit frilanskorps.
Haugesunds Avis kutta i fjor 10 millionar kroner i kostnader. I år er målet eit kostnadskutt på 23 millionar kroner. Som i dei fleste andre aviser er det annonsemarknaden som sviktar. Ein marknad Haugesundnytt nå skal inn i.
– Det kostar å gi ut avisa gratis og me må ha nokre millionar i inntekt. Men me har eit realistisk og nøkternt budsjett og trur dette skal gå greitt, seier Merkesvik.
Også TV Haugaland satsar
Også TV Haugaland i Haugesund har i haust lyst ut to nye journaliststillingar. Etter mange år med underskot går TV Haugaland nå i pluss.
Det gir ansvarleg redaktør Alexander Urrang Hauge sjansen til å satsa endå meir på innhaldet.
– Me har rigga skuta for vekst, og er fast i trua på at det er lokalt innhald lokalsamfunnet på Haugalandet vil ha, seier redaktøren.