Her går halvparten av restaurantane med underskot

– Det er rett og slett knallhardt, og det er over hovudet ikkje slik som det var, seier Terje Vallestad som har vore i serveringsbransjen i fleire år.

Først og fremst har han drive den populære Cafe Sting i sentrum av Stavanger, men dei seinare åra har han også servert siddisar gjennom Kult-kafeen eit steinkast lenger unna.

• Les òg: Denne maten har vi ikke råd til
• Les òg: - Merkelig med stengte restauranter

Over halvparten med underskot

Han merkar at forholda i restaurant og serveringsbransjen ikkje er som dei ein gong var i oljebyen Stavanger, som har Norges høgste løningar og som profilerer seg som hovudstaden i matfylket Rogaland.

– Det har nesten blitt umogleg å klara seg når ein driv med mat eller kultur. Du har ikkje råd til å betala dei menneskja som skal til for å driva ein tilfredsstillande stad, seier Vallestad.

Og det er ikkje tvil om at han driv i ein vanskeleg bransje.

Rekneskapane NRK har sett på for 83 selskap som driv restaurant eller kafe i Stavanger syner at over halvparten gjekk med underskot i fjor. Nokre har også solide og alarmerande minustal.

– Nærmar seg ei smertegrense

Puber og barar går stort sett i pluss, men fleire serveringsstader som tilbyr mat opplever ei heilt anna verd:

– Lønskostnadene er høge, leiga er dyr og råvareprisane har auka. Restaurantane baserer seg dessutan mykje på «drop-in» som vil sei at ein du ikkje veit om restauranten blir tom eller full, men du må likevel ha folka og råvarene inne til å takla ein full restaurant, seier Cathrine Trettenes i City Brasserie.

• Les òg: Vil ha «mat-Oscar» til Stavanger
• Les òg: Gladmat i bilete

Ho er ei av dei som har merka at det å jobba nær sagt døgnet rundt, ikkje er nok. Nyleg måtte ho ta City Brasserie midt i sentrum av Stavanger til skifteretten. Det blei for dyrt og inntektene sto ikkje i forhold til utgiftene.

– Er det for mange restaurantar i byen?

– Eg meiner det er viktig at Stavanger har eit stort og variert tilbod, men det byrjar kanskje å nærma seg ei smertegrense. Særleg i midtsjiktet, seier Trettenes.

Vil ha betre rammevilkår

Det er for mange dyrt å eta ute, samstundes er avgiftene på alkohol høge og gjestene forventar seg stadig betre service. Den kombinasjonen går ikkje i hop, seier Terje Vallestad:

– Me vil jo ha service, og det fortener folk også. For det er frykteleg dyrt å gå ut i Norge, og dyrare blir det når færre går ut.

Vallestad er uroleg for restaurantbransjen seie framtid. Han meiner avgiftsnivået er for høgt og frisleppet i den lokale utelivsbransjen har vore for stort. Han meiner rammevilkåra for restaurantbransjen bør bli betre.