Over hundre gravide kvinner og nybakte fedrar i kø i heile natt

I heile natt har det stått gravide kvinner og nybakte fedrar i kø utanfor Baby shop på Forus. Årsaka er at dei kunne skaffa seg vogner og vipper for mindre enn halvparten av kva det kostar til vanleg.

– Eg hadde inga aning om at det skulle vera så mange folk her, seier Kjetil Ingebrigtsen frå butikken berre 10 minutt før butikken opna klokka 07.00 i dag.

• Les òg: Shoppinggale brasilianere invaderer USAs kjøpesentere

12 timar i kø

Framføre han står det meir enn hundre gravide kvinner og nybakte fedrar, dei har nå kome inn på senteret. Men i natt var dei ute på parkeringsplassane.

– Eg har vore her sidan klokka sju i går kveld. Det var tre føre meg så har det kome folk i heile natt. Me sat saman i ein ring, var vakne og sosiale, seier Terese Madsen, som berre har hatt det kjekt i køen.

Ei anna som har vore i kø i heile natt er Lisa Drange. Ho ventar barn i mars, og har allereie ein liten heime.

– Eg sparer veldig mykje pengar på dette. Eg skal kjøpa meg barnevogn, reisevogn og vippestol, seier ho.

Både ho og barnet i magen har hatt det fint forsikrar ho.

– Eg fekk meg litt svevn i bilen til veninna mi, seier ho.

Sparar 7000 kroner

Tretti minutt etter hadde ho vore inne og handla alt ho treng til babyen som snart skal koma.

– Var det verdt det?

– Ja, eg har spart 7000 kroner, seier Drange nøgd.

Også småbarnsfedrar har blitt sende ut for å kjøpa inn. To av desse var Fredrik Birkedal og Thor Erik Nilsen.

Dei har også tatt ansvar i køen i natt, og passa på at alle har hatt det fint.

– Til tider har det vore kaldt, men det har vore veldig kjekt. Me har tatt nokre rundar og sjekka korleis folk har hatt det, seier Nilsen.

– Eg møtte på ei som skulle føda om berre to veker, ho sat likevel i køen, seier Fredrik Birkedal.

Dei forsikrar om at dei ikkje måtte hjelpa til med fødslar på parkeringsplassen på Forus.