Fire datasenter-planar i Rogaland

På Undheim i Time er det planar om eit datasenter frå Green Mountain, skriv Stavanger Aftenblad.

Grunnarbeid er i gang, og det er sendt ut nabovarsel.

Tomta ligg like ved vindparken på Høg-Jæren og blei i 2021 regulert til såkalla «kraftintensiv næring».

Dette er det fjerde datasenteret Green Mountain har ønska å bygge i Rogaland. I tillegg til planane på Undheim, kan du i denne saka også lese om Kalberg i Time, Jørpeland i Strand og Vagle i Sandnes.

Ordførar: – Ferdig regulert

– Vi har ikkje tatt noka endeleg investeringsavgjerd. Men for oss er det viktig å vite at vi har evne og høve til å byggje der vi nå bestemmer oss for å ønske å bygge, seier Green Mountain-direktør Svein Atle Hagaseth.

Han seier at Undheim-planane er eit såkalla samlokaliseringsdatasenter med alt frå ein til 50 kundar.

Time-ordførar Andreas Vollsund (H) kjenner ikkje til om det er komme nokon byggesøknad, men seier området for lengst er ferdig politisk behandla.

– Viss det er i høve til vedtatt reguleringsplan, er det ikkje ei politisk behandling. Dette har vi allereie sagt ja til og er klar over kva vi har regulert til, seier han.

Ordføraren har lese i avisa at det ikkje er tatt noka avgjerd om å investere. Men når den er på plass, byggesøknad sendt og behandla, er det berre å bygge, seier han.

Ikkje med det første

Så at Undheim-planane kan gå noko raskare enn dei tre andre datasentera Green Mountain har ønska å bygge, er det ikkje tvil om.

Ein annan stad i Time på Jæren, Kalberg, ville Green Mountain investere 50 milliardar for å skape minst 500 årsverk i 2023. På matjord ville Green Mountain bygge eit datasenter som eit av dei største teknologiselskapa i verda skulle ha.

Men våren 2024 blei det klart at dei ikkje ville gjennomføre planane «med det første».

– Vi tar til etterretning at det tar tid, sa Hagaseth den gongen.

Skal greie ut konsekvensane

På Jørpeland i Strand kommune er Green Mountain kanskje nærast å få klarsignal til å sette i gang arbeidet.

Før jul bestemte kommunestyret i Strand å greie ut konsekvensane til planane om datasenter på tomta til det gamle stålverket. Så seint som i februar ville Sp, INP, SV og Rødt stoppe planane, men slik blei det ikkje.

Den folkelege motstanden har vore til stades. Folk har møtt opp til markeringar, og i lokalavisa Strandbuen har 76 prosent av lesarane svart at dei ikkje vil ha verksemda.

Utsette saka før dei sa nei

I september i 2024 blei det kjent planar om datasenter i Vagle næringspark i Sandnes.

Tidleg i februar skulle kommunestyrepolitikarane diskutere saka etter først å ha utsett ho fordi dei fekk for kort tid til å førebu seg.

Midt i februar stemte likevel eit fleirtal mot ei etablering.

Fleire meiner saka var med på å velte det politiske fleirtalet dei fram til da hadde hatt i kommunen.