I kommunen heilt sør i Rogaland herskar den reinaste klondyke-stemninga. Arbeidsløysa er på eit rekordlågt nivå med 1,7 prosent. Berre 27 av dei drygt 3000 innbyggjarane manglar jobb.
Det er nesten ikkje koronasmitte i kommunen. Og næringslivet segler i medvind.
Ordførar Magnhild Eia (Sp) trur nesten ikkje det ho ser.
– Dette er ei gladsak frå A til Å. Næringslivet her går så det grin, seier ho.
Treng fleire folk i fabrikken
Mykje av dette skyldas et næringsliv der byggevarebransjen er den viktigaste. Nordmenn har nytta pandemien til å pusse opp heime, og det merker hjørnesteinsbedrifta Nordan på Moi.
– Her er det stor pågang og stor etterspørsel, seier Knut Petter Netland, som er sjef for vindaugefabrikken.
Og det som er godt nytt for Nordan, er ofte godt nytt for heile kommunen.
– Nå må vi ha meir arbeidskraft for å dekkje etterspørselen, seier Netland, som er mildt sagt overraska over situasjonen.
– Det var ikkje dette vi rekna med da vi trakk ned teppet for eitt år sidan og etablerte krisestabar. Det har blitt ein heilt anna kvardag.
Må kanskje betale tilbake
Næringslivet i Lund kommune består av lite uteliv og turisme. Det kan forklara at dei er lite ramma av dei negative følgjene av korona, seier regiondirektør Tone Grindland i NHO Rogaland.
– Reiselivet slit, medan byggevarebransjen går bra. Nordan og Lund er i ein posisjon der dei kan vere i full aktivitet og halde folk i arbeid, seier ho.
Ordførar Eia har hamna i den noko uvande situasjonen at ingen bedrifter treng dei statlege koronamidla.
– Vi kan rett og slett komma dit at vi må betale tilbake noko av potten. Vi skjønner ikkje kven som skal søke om desse midla, seier ho.
Dette er unikt, meiner Grindland i NHO.
– Dei fleste kommunane er anten i gang med å betale ut støtte eller dei skal begynne å behandle søknader, seier ho.
Litt meir optimisme i Rogaland
Den nyaste medlemsundersøkinga til NHO viser at det går litt betre med bedrifter i Rogaland enn elles i landet. I Rogaland er dei også litt meir optimistiske enn elles i landet.
– Ingen andre regionar har så gode tal. Vi er vant med at det går litt opp og ned her, og at vi alltid kjem oss igjennom det, seier Grindland.
Ho er glad for å høyre at det går godt i Lund.
– Det er fleire kommunar der det går godt. Men det er stor skilnad, og det er dette spriket som er vanskeleg å handtera.