Inne i den offisielle Manchester City-butikken ved klubben sin heimebane, Etihad Stadium, ber nesten alle skjortene gullfoten frå Bryne sitt namn og nummer.
Den 22 år gamle spissen har blitt ein favoritt i England, både hjå folk og avisene.
I butikken som berre sel City-suvenirar er det tett mellom Haaland-drakter, -t-skjorter og -plakatar.
– Trøye-salet har gått gjennom taket denne sesongen. Det er berre eitt namn folk vil ha på ryggen, og det er Haaland, seier butikkmedarbeidar Frankie Damico entusiastisk.
Fotballstjerna frå Jæren og Noreg er blitt ei gullgruve for dei som sel supporterutstyr.
For å ha nok på lager, er det gjort store bestillingar av Haaland-utstyr.
– Er det samanheng mellom salet og alle måla han har laga for City?
– Eg trur det handlar om han (Haaland). Han held fram med å skåra mål, og folk er veldig begeistra. Han har kome med noko annleis til Manchester. Det handlar om han, ikkje berre at han skårar hat trick, meiner butikkmedarbeidaren.
– Eg berre måtte ha Haaland
Inne på butikken går 12 år gamle Brian Ramirez saman med mor si, Cristie. I hendene har ho eit lass av klesartiklar med klubblogoen på.
Ei trøye skil seg ut i haugen. Ei drakt med eit stort 9-tal og ein jærbu sitt namn på baksida.
– Vanlegvis liker eg ikkje å kjøpe drakt med namn bak, men eg måtte berre ha Haaland. Det er et «must», seier Ramirez.
12-åringen frå USA er ein trufast City-supporter, og har følgt nøye med på Haaland.
– Eg liker aggresjonen hans. Han er målretta og aggressiv, og eg liker måten han spelar på. Han er vår beste spelar nå.
Møter gamleklubben
Onsdag kveld spelar «oksen frå Bryne» mot gamleklubben Borussia Dortmund i Meisterligaen.
Det betyr startskotet for det City manglar for å bli blant dei aller største klubbane; meisterligatrofeet.
– Det er trofeet City-tilhengarar vil ha meir enn noko anna. Han (Haaland) er det klubben har mangla i Meisterligaen. Han er den fødde målskårar, og det vil ta oss langt i den gjævaste klubbturneringa, seier Damico.
Men det er ikkje berre i Manchester City-butikken dei merkar Haaland-feberen.
Ifølge dei som jobbar i klubben har det blitt veldig mykje meir trykk frå utanlandske medium etter at storskåraren frå Noreg kom til klubben.
City-fans trur på Meisterliga-suksess
Det kan også Sky Sport-reporter Alan Irwin stadfesta.
– Erling Haaland er tema på kvar pressekonferanse med City-manager Pep Guardiola. Og kvifor skal det ikkje vera det med den fantastiske starten han har hatt på City-karrieren.
Den erfaren fotballreporteren ramsar opp den imponerande Haaland-statistikken: Tolv mål totalt for City, to av dei i Meisterligaen, ti i Premier League på berre seks kampar.
Då han skåra sitt førre mål i den engelske toppdivisjonen tangerte han ein «umogleg» rekord: Ingen har nokosinne skåra ti mål raskare i Premier League.
– Erling er 22 år. Framtida ser så lys ut for han og for Manchester City, seier Sky Sport-reporter Irwin.
Vinner City Mesterligaen denne sesongen?
Han viser til kor nær City har vore Meisterligatrofeet tidlegare sesongar, og at City-fans nå har tru på at Haaland blir den vesle forskjellen som tar dei det siste steget til topps.
– Hadde Erling spelt for City førre sesong, hadde han truleg tatt dei minst til finalen. Kanskje hadde han skåra eitt mål eller to som gjorde at dei vann finalen også, meiner Sky Sport-reporteren.