– Eg er ein del av oljestatistikken, og visste at eg ville gå denne vegen, seier Anne Sofie Vistnes.
I januar i fjor mista ho oljejobben på Randaberg Industries, der ho jobba med lønn og økonomi. Etter å ha blitt oppsagt søkte ho seg til sjukepleiarstudiet ved Universitetet i Stavanger (UiS).
Nå er ho førsteårsstudent og ein del av den store bølga søkarar til sjukepleiarstudiet her i landet.
Då Vistnes søkte studiet ved UiS i fjor var søknadsauken på 40 prosent samanlikna med året før, i år er auken på 35 prosent frå i fjor, viser tal frå Samordna opptak.
Sjukepleiarforbundet: – Veldig kjekt
På landsbasis har nesten 20 prosent fleire enn i fjor sjukepleiarutdanning som førsteval.
– Eg trur dette har noko med oljebransjen å gjera. Det er massiv nedbemanning i oljeyrka, og derfor vel mange sjukepleiar- eller læraryrket. Det er bra fordi me treng fleire sjukepleiarar, meiner Vistnes.
Også ved Høgskulen Stord/Haugesund (HSH) søker fleire seg til sjupleiarutdanninga. Søknadsauken der er på 18 prosent samanlikna med fjoråret. Dei gode søknadstala landet over gler naturleg nok Sjukepleiarforbundet.
– Dette er veldig kjekt. Nå håpar eg kvaliteten blir i fokus, ikkje berre det å få flest til å gjennomføra. Det er viktig med godt innhald i utdanninga, seier fylkesleiar i Rogaland, Nina Horpestad.
«Sjukepleie i skotet» er overskrifta på pressemeldinga som blei sendt ut frå Høgskulen Stord/Haugesund etter at tala frå Samordna opptak blei klare. Auken i søkarar til sjukepleiarutdanninga er på 50 prosent sidan 2013.
– Det blir større rift om plassane og høgare poenggrense for å komma inn, så får me håpa at det igjen gjer noko med kvaliteten på dei studentane som tar til på studia, seier studiesjef Gro Nesheim ved HSH.
VIDEO: Fleire søker seg til sjukepleiarutdanninga, færre til petroleumsfaga.
Fleire menn
Talet på menn som søker seg til sjukepleiarstudiet går også litt opp. Ved Stort/Haugesund gjekk mannsdelen opp med tre prosent, ifølge Sjukepleiarforbundet.
– Alle prosentar opp er gledeleg for oss når det gjeld ut jamna ut kjønnsforskjellane i vårt yrke. Det er viktig å få inn mannfolka i eit fram til nå veldig kvinnedominert yrke, seier fylkesleiar i Sjukepleiarforbundet, Nina Horpestad.
At fleire menn søker seg til sjukepleiarfaget merkar òg førsteårsstudent Anita Lærum på Universitetet i Stavanger. Ho er blant dei som nå har valt ein ny retning i livet.
– Dette er ikkje eit typisk dameyrke lenger. Det er ein god del menn som går her.
Ho håpar nå at søknadsboomen kan bidra til å heva statusen og lønna til sjukepleiarane.
– Yrket har lenge hatt ein laber status. Med fleire søkarar kan statusen bli heva. Det er bra fordi dette er eit veldig viktig yrke.
