– Dette er ei avgjersle som er teken saman med klubben, seier Asbjørn Helgeland til NRK like etter FK Haugesund sende ut pressemelding om at sportssjefen nå er ferdig i klubben.
Han legg til at det ikkje har vore motvilje frå hans side, men det blir heller ikkje lagt skjul på at avgangen vil gi klubben betre økonomisk handlingsrom.
– Eg har sitte i denne stillinga i meir enn seks og eit halvt år, noko som dessverre er svært lenge i ei leiarstilling innan fotball. Samstundes står klubben ovanfor ein del kostnadsmessige utfordringar framover, derfor synst eg det var greitt å fråtre stillinga mi, seier han.
Tok klubben til bronse
Asbjørn Helgeland var den første spelaren som signerte med FK Haugesund etter fusjonen mellom Djerv 1919 og Haugar i 1993.
Då han blei sportssjef i klubben i 2008 var det første han gjorde å henta Jostein Grindhaug til klubben. Saman har dei ført klubben opp til eliteserien, og høgdepunktet var bronsen i 2013.
- Les òg:
– Eg har hatt fantastiske år i FK Haugesund og ser tilbake på dei med stor glede. Det har vore eit eventyr, seier Helgeland.
Nå ser han fram til å få meir tid til familien, og nye utfordringar.