Naudetatane rykka i åtte tida ut til Revtangen i Klepp kommune på Jæren. Dei fekk melding om at ein fritidsbåt på om lag 25 fot skal ha køyrd på land.
Hovudredningssentralen Sør-Norge (HRS) har sende ut redningshelikopter.
– Båten køyrde i stor fart inn på land på Revtangen. Me veit ikkje om det var folk i den eller ikkje, men helikopteret er framme nå, fortel redningsleiar i HRS, Bjørn Jarle Åmlid.
Rett før halv ni melder politiet at redningsmannskap frå helikopteret skal ha kome seg om bord i båten.
Der er det to personar som er tilsynelatande uskadde, melder dei.
Kva som har skjedd er likevel uvisst.
– Dei to blir frakta med helikopteret til flyplassen på Sola. Politiet ventar på dei der, då får me nok svar på kva det er som har skjedd, seier operasjonsleiar i politiet Brit Randulff.
Ifølgje HRS det vera snakk om austlendingar som var i Rogaland for å kjøpa båten i dag. Dei var på veg heim til Austlandet med den nyinnkjøpte båten då uhellet skjedde på grunn av feilnavigasjon.
Redningsskøyta «Bergen Kreds» tek seg av båten.
