«Kjærlighetsuka» er blitt ein tradisjon i Sokndal. I desse dagar feirar arrangementet 10-årsjubileum.
Poenget er å setja kjærleiken i sentrum og gjerne få sokndølane til å setja fleire barn til vera.
«Kjærlighetsuka» går av stabelen i september og då skulle ein gjerne tru ein såg resultat ni månader seinare, i juni.
Men statistikken er heller dyster lesnad for dei som håpar på fleire innbyggarar i Dalane-kommunen.
Svak fødselsstatistikk i juni
Fødselstala for juni dei tre siste åra er dei dårlegaste i Sokndals historie. I juni i 2010 blei det født berre eitt barn, i juni i år kom ingen nye sokndølar til verda.
– Me prøver å oppmuntra folk til å produsera meir, men me kan ikkje leia folk opp i sengene heller, seier Olav Lundø, primus motor og mannen som starta «Kjærlighetsuka»
– Flinke til å bruka prevensjon
Sokndal kommune kan i alle fall ikkje kritiserast for å ikkje satsa på kjærleiken. Kommunen har nå tilsett eigen sexolog.
Han tar mangelen på fødslar som eit teikn på at sokndølane er flinke til å bruka prevensjon.
– Det går jo fint an å ha sex utan at det blir barn av det. Og det vil eg som sexolog oppmuntra til, seier sexolog Tom Nybo.
– For varmt å føda i juni
Sjubarnsmor Greta Vestbøstad har sin teori om kvifor «Kjærlighetsuka» gir svake utslag i fødselsstatistikken.
– Det er for varmt å føda ungar i juni. Eg har prøvd det sjølv og det var heilt forferdeleg, ler ho.