– Kom då!
Maaike Visser drar med seg eselet «Bobby» til ein ventande familie.
Ho og mannen Jan Kattenberg ønska seg ein «kos og klappe»-faktor på campinga Tubbehaugen i Gol. Det måtte berre bli esel.
– Mannen min meinte det aldri kom til å gå fordi det nesten ikkje finst esel i Noreg. Så da sa eg at då skal me ha det!
Som sagt, så gjort.
Om du har prøvd å kjøpe dei esla som dukka opp på Finn.no det siste året, har du ikkje klart det. Dei står nemleg i Gol.
– Alle esla som vart lagt ut for sal på Finn.no det siste året, har me kjøpt, smiler Visser stolt.
I alt fem eksemplar: Rossi, Molly, Bobby, Tøffe og Oscar.
Sta som eit esel
Familien Reiten Steine skal ta med seg Bobby og Rossi ut på tur. Eller eselvandring, om du vil.
Mor Mary er ikkje så van med eslar frå før av, men satsar på at det går bra.
– Det er fint å få tatt med ungane ut litt. Det blir litt mykje TV-titting og data. Så me tenkte eslar var ein strålande ide. Litt utanom det vanlege, forklarar ho.
Sta som eit esel, har du vel kanskje høyrt før. Heilt usant er det ikkje.
– Utfordringa blir vel å få dei med der me vil dei skal gå. Men den utfordringa tek eg. Me må berre vise kven som er sjefen, smiler Mary.
Etter litt startproblem og eit esel som braut seg ut for å vere med på tur, går vandringa som ein draum.
– Det vart litt strabasiøst til å begynne med. Men no ser det ut til å gå greitt. Det gav meirsmak, eg kunne godt tenke meg ein lengre tur.
Ungane nikkar entusiastisk.
Bitne av basillen
Dei seinaste åra har alpakkavandring blitt populært. Visser trur ho veit kvifor folk vil vandre med dyr på tur.
– Det er så utruleg koseleg med den nærleiken til dyr. Dyra synest også det er fint. Det blir sagt at esel er sta, men dei elskar å gå på tur. Og dei elskar å ha kontakt med menneske, seier Visser.
– Det blir ikkje for mykje tur for esla, då?
– Nei, eg trur dei storkosar seg.
Dei er så bitne av basillen at dei skal importere to esel til.
– Eg har kjøpt meg hund i Nederland der eg er frå og då sa mannen min at eg like gjerne kunne ta med to esel. Så da vart det slik, ler ho.