Skrev norsk idrettshistorie framfor superkjendisar: – Kjempebra for sporten

Kva har Ariana Grande, Snoop Dogg, Ryan Gosling og Kendall Jenner til felles?

Dei har alle hasta til Paris for å bli med på den pågåande idrettsfesten, og dagens dressurfinale var på ingen måte fri for Hollywood-heltar.

– Det er kjempebra for sporten, seier Isabel Freese til NRK.

Søndag skreiv ho norsk OL-historie framfor stjerner som Ryan Gosling og Eva Mendes, då ho blei nummer 10 i dressurfinalen i Paris. Det var første gong i moderne historie at ein norsk ekvipasje har kvalifisert seg til OL-finalen i dressur.

Freese var svært fornøgd med at kjendisane var på plass:

– Det er gøy, for det blir bra fokus på sporten, meiner Freese.

Fall framfor Tom Cruise

Og dressurarenaen framfor det mektige slottet i Versailles er på langt nær det einaste staden stjernene har dukka opp.

Særleg turnhallen har krydd av store namn, noko 17 år gamle Ruby Evans verkeleg fekk kjenne på.

Under kvalifiseringa fall nemleg den britiske tenåringsturnaren rett føre Tom Cruise, og resten av kjendiseliten.

– Hæ, eg visste ikkje eingong at dei var her, og no har dei sett meg tryne, sa ho til pressa etterpå.

– Det er stort, fortsette ho.

Superstjernene var der truleg for å heie fram USAs Simone Biles. Amerikanaren har skrive historie og stukke av med mange av overskriftene under det pågåande OL-et.

Tok selfie med Snoop Dogg

Tilbake på dressurbanen er Freese open om at ho ikkje blir påverka noko særleg av å ha så store namn på tribunen, utover det at ho meiner det gir viktig merksemd til sporten.

– Dei siste to timane før eg byrjar å ri går eg inn i ein slags tunnel og er veldig fokusert på meg sjølv, så klart, seier ho, før ho erkjenner at kjendisnivået i Paris er meir enn ho er vand til:

– Det er ulikt frå stemne til stemne, men det er ein del fotballkjendisar og sånn, som har kjærastar eller koner som rir, men det her er ein klasse for seg.

Den amerikanske rapparen Snoop Dogg har vore på ei rekke OL-arenaer, inkludert dressurbanen:

– Hestepassaren min møtte han, og han eine som rir for India hadde fått selfie med han. Så han sa «ååå, sjå på dette her». Han var rett oppi vegen her, men eg fekk det ikkje med meg, dessverre, seier Freese.

null

Spiller nå

Kommentatorene settes ut: – Det er over grensa 00:54

Neste

Får drømmetreff fra midtbanen 00:47 Slik møtte han kjæresten 00:27 Absurde VM-bilder: – Han bruker sokker utenpå skoen 00:54

Vis flere