Sakna fotojournalist funnen død i Ukraina

Den ukrainske fotojournalisten Max Levin, som vart meldt sakna utanfor Kyiv 13. mars, er funnen død, melder ukrainske styresmakter.

Levin har jobba som fotojournalist, dokumentarfotograf og kameramann for fleire ukrainske og internasjonale medium. Blant anna britiske BBC og nyheitsbyrå som Ap og Reuters, og bileta hans er publiserte i medium som Wall Street Journal og Time Magazine.

13. mars forsvann han i Vysjorod-distriktet i Kyiv, der det då gjekk føre seg harde kampar mellom russiske og ukrainske styrkar.

Laurdag melde Instituttet for masseinformasjon (IMI) i Ukraina at 41-åringen vart funnen død fredag i landsbyen huta Mezhyhirska i Vysjorod-distriktet.

Den ukrainske statsadvokaten stadfestar dette, og det same gjer president Volodymyr Zelenskyj sin rådgjevar Andrij Jermak på Telegram.

(NTB)