Russland avviser at Ukraina skaut ned hypersoniske rakettar
Ukraina sin forsvarsminister Oleksij Reznikov hevda tysdag at seks russiske hypersoniske Kinzjal-rakettar og tolv andre rakettar blei skotne ned over Ukraina natt til tysdag. Dette er ikkje stadfesta frå anna hald.
Den russiske forsvarsministeren Sergej Sjojgu avviser Reznikov sin påstand, melder det russiske nyheitsbyrået RIA tysdag kveld.
Sjojgu seier ifylgje RIA at ukrainarane «hevdar å ha skote ned tre gonger så mange rakettar som faktisk blei fyrt av frå Russland».
Sjojgu si utsegn slik nyheitsbyrået formidlar ho, viser ikkje spesifikt til det seinaste angrepet. (NTB)