Kjøper millionar av vaksinedosar

Regjeringa har sett av 3,5 milliardar kroner til å kjøpe inn minst 10 millionar dosar med koronavaksine som skal brukast i 2022 og 2023.

Vaksinane er mellom anna tenkte brukte som såkalla boosterdosar, slik at effekten av vaksinasjonen skal vare lenger hos folk som har blitt fullvaksinert tidlegare.

– Dei framtidige vaksineavtalane er nødvendige for å sikre tilgang på vaksinar mot nye virusvariantar eller til boosterdosar, dersom det skulle vere nødvendig, seier statsminister Erna Solberg.