To knivstikkingar i Tønsberg
Politiet i Vestfold fekk i natt melding om to tilfelle av knivstikking i byen.
Ved eittida vart ein mann i 20-åra stukken ned med kniv ved ein utestad i Tønsberg sentrum. Han vart køyrd til sjukehus med alvorlege, men ikkje livstruande skader. Politiet arresterte etter kort tid ein mann i 40-åra som er sikta for knivstikkinga.
Ved firetida kom melding nummer to. Ein mann i 50-åra er alvorleg skadd etter knivstikking i ein leilegheit på Kaldnes på Nøtterøy-sida like utanfor sentrum. Også i det tilfellet vart ein mistenkt mann i 40-åra arrestert etter kort tid, opplyser operasjonsleiar Erik Gunnerud i Søraust politidistrikt.
3770 sivile drepne i Ukraina
Minst 3770 sivile er drepne i Ukraina sidan Russland invaderte landet i februar, viser tal som FN har publisert. 251 av dei drepne er barn.
FNs høgkommissær for menneskerettar seier at det faktiske talet på døde og såra i Ukraina truleg er mykje høgare fordi det er vanskeleg å skaffe presis oversikt i eit krigsområde.
FN opplyser at talet på ukrainske flyktningar no er oppe i 13 millionar. 6 millionar har flykta utanlands, og minst like mange er flyktningar i eige land. Polen har tatt imot 3,4 millionar ukrainske flyktningar og Romania nesten 1 million.
Kvinne omkom i frontkollisjon i Flå
Ei kvinne i slutten av 50-åra mista livet i ein frontkollisjon på riksveg 7 i Hallingdal onsdag kveld. To menn i 50-åra vart flogne til Ullevål med alvorlege skader. Ulukka skjedde då ein personbil og ein varebil kolliderte i 80-sona ved ei avkøyring mellom Flå og Bromma.
Vegen var stengt i mange timar, men gjenopna ved totida i natt etter at politiet sine teknikarar og Vegvesenets ulukkeskommisjon var ferdige med undersøkingane sine.