NRK Meny
Normal

Okta máilmmi buoremus koahkkaskuvllain

Nuorra sámibárdni Lars Petter Suikkari (18) lea fárren Sveitsii vázzit Culinary Arts Academy Switzerland skuvllas.

Lars Petter Suikkari i Sveits
Foto: Lars Petter Suikkari/ Maret Inger A. Anti / Privat/NRK

– Daid vuosttaš vahkuid lea leamašan hui olu diehtojuohkin ja dat ahte oahpásmuvvat skuvllain. Easka mannan vahkus álggiimet kohkket, ja oahppat ođđa vugiid, lohká Lars Petter.

Lars Petter ii leat leamaš Sveitsas go badjelaš guokte vahku, ja orru dál juo loaktime hui bures. Son diđii ahte háliidii koahkkan šaddat, ja danne háliidii ge eanet oahppat.

– Lei miella vázzit skuvlla, go in háliidan njuolgga muhton boradanbáikái bargat. Háliidin Universiteta vásáhusaid oažžut, lohká Lars Petter.

Dan gal oažžu Sveitsas. Skuvla lea okta dain buoremus koahkkaskuvllain máilmmis, ja doppe gávdná máŋgasa máilmmi buoremus koahkain. Dáppe galgá Lars Petter leat 2-3 jagi, dassážii go lea nagodan bachelorgráda.

– Leat hui olu olbmot dáppe, ja buohkat beroštit dan seammá go mun – ráhkadit borramušaid. Lea hui somá deaivvadit olbmuiguin geain lea seammá beroštupmi go mus, lohká Lars Petter.

Internašunála biras

Skuvllas leat oahppit máŋgga riikkas, ja lea hui ivdnás biras doppe. Leat njeallje oahppi geat leat eret Skandinávias, ja Lars Petter lea okto sápmelaš doppe.

Beef consomme mise en plance

Oahppit galget oahppat ođđa teknihkaid.

Foto: Lars Petter Suikkari / Privat

– Lea veahá ártet leat okto sápmelažžan dáppe, muhto measta juohke beaivvi gávdná olbmo gii lea eanet erenomáš go ieš. Dáppe gal sihkkarit sáhttet eará álgoálbmot nuora maiddái, lohká Lars Petter.

Ja go juo lea koahkkaskuvllas, mii han de lea buoret go guossohit goikebierggu olbmuide?

– Lean geahččalan goikebierggu fállat olbmuide, ja dat lea mannan bures. Mun geahččalan gal muitalit veahá sápmelaččaid birra go lean dáppe, go meastta ii oktage dieđe min birra, muitala Lars Petter.

Google vehkiin gávnnai skuvlla

– Dalle go ledjen ohcame skuvlla, de mun Google-siidui čállen "máilmmi buoremus koahkkaskuvla", ja nu gávdnen dán skuvlla. Lassin dasa lei eará skuvla Amerihkás ja nubbi ges Parisas. Mu mielas dát skuvlla orui hui buorre, ja dalle sáddejin ohcamuša.

Skuvlla ovddasteaddji bođii finadit Romssas, ja ođđajagemánus lei jearahallan doppe.

– Buot manai hui bures, ja ožžon saji dán skuvlii. Lei hirbmat buorre dovdu, ja šattai vel ain buoret go de bohten deike Sveitsii. Buot lea buoret go ledjen vuordán, lohká Lars Petter.

Stuorra erohusat

– Dáppe leat hui garra njuolggadusat. Mis leat uniforbmat ja mii fertet leat basadan juohke beaivve. Skuvlii ferte boahtit kvártta ovdal oahpahus álgá, lohká Lars Petter.

Culinary Arts Academy Switzerland
Foto: Lars Petter Suikkari / Privat

Muitala maid ahte sis fertejit leat hui dárkilat, danne go sii ovddastit skuvlla. Muhto Sveitsa lea gal oalle seammalágan go Norga, ja Lars Petter muitala ahte Sveitsa nai lea divrras riika.

– Mun lean hárjánan dasa, muhto lea gal earát geat eai liiko nu bures hattiide, lohká Lars Petter.

Báhkka riika

Juoga mii lea maiddái earálágan Sveitsas go Norggas lea dálki. Dál golggotmánus lea sullii 18 lieggaceahki doppe.

– Dál lea dego geassi doppe, ja lea menddo báhkas. Mun váccán dáppe T-báiddiin, muhto earát gal cogget jáhkaid, muitala Lars Petter.

Muđui lea dát hirbmat fiinna gávpot, ja muitala ahte su mielas orru leame hui dábálaš sveitsalaš gávpot.

Lars Petter Suikkari i Sveits
Foto: Lars Petter Suikkari / Privat

– Lea hui fiinna gávpot, mas leat ollu girkut, alla várit ja stuorra eanu, muitala Lars Petter.

Háliida rahpat boradanbáiki

Go lea geargan dán skuvlla vázzimis ja lea váldán bachelorgráda, de háliida Lars Petter álgit koahkkan muhtun boradansadjái. Ja loahpas livččii jurdda rahpat boradanbáikki mii lea su iežas.

– Várra raban boradanbáikki Stockholmmas, go dat lea stuora gávpot ja soaitá leat álki oastit bohccobierggu. Go mun gal háliidan ráhkadit sámi borramušaid, lohká Lars Petter.