NRK Meny
Normal

Movt čállá BRB ja LOL sámegillii?

Nuorra giellabargit váillaheigga buriid neahttasániid sámegillii, ja dainna háliideigga dahkat juoidá.

Helge Aslaksen Ravna og Ánná Káisá Partapuoli
Foto: Privat

Dán áigge geavahit nuorat hirbmat olu oanádusaid neahtas, muhto diet eai gávdno sámegillii. Dainna leaba ovddeš giellaambassadevrrat Helge Aslaksen Ravna ja Ánná Káisá Partapuoli bargan juoidá. Soai leaba hutkan muhtun sániid mat sáhttet geavahuvvot dan sadjái go oanidit eaŋgalsgillii dahje dárogillii.

– Moai letne geahččalan daid eanemus geavahuvvon sániid jorgalit sámegillii, nugo ASAP lea VuVe - vuosttáš vejolašvuođas ja YOLO lea EDO – ealát dušše oktii, muitala Partapuoli.

Samisk ny ordliste

Dá lea sátnelistu.

Foto: Screenshot - samasblogg.wordpress.com

Soai leaba geahččalan hutkat nu álkes dadjanvugiid go vejolaš. Ledje ge 4 giellaambassadevrra geat barge dáinna bloggain, ja nu sii dárbbašedje juoidá man birra sáhtte čállit.

– Dávjá go moai Helgiin leimme fárrolaga de muitaleimme dárogillii maid moai leimme bargamin, ja das de álggiime jurddašit mo dat livččii sámegillii jorgaluvvon– Nu mo ovdamearkka dihte LOL, muitala Partapuoli.

Ođasmahttá giela

Sudnuide lea hirbmat dehálaš ovdánahttit ja ođasmahttit nuoraid sámegiela. Ja go soai leigga gávnnaheamen dáid sániid de ii lean dušše jurdda ahte ferte jorgalit daid sáni, muhto sátni ferte maiddái leat álki ja das ferte leat veahá ''švung'', nu go Partapuoli muitala.

– Dasa lassin ferte mearkkašit juoidá, nugo BoB lea oaniduvvon boagustit olles beaivve. Muhto gávdnojit sihkkarit máŋga vuogi lohkat dan, go moai leimme dušše suohtas dihte bargamin dán.

Háliideaba eanet evttohusaid

Soai leaba maiddái geahččalan eará nuorain oažžut evttohusaid, muhto dat ii lea álo nu álki.

– Moai letne geavahan blogga, ja doppe jearran eará olbmuin leat go sis sánit. Muhto jus earáin leat eará evttohusat de sáhttet daid sáddestit, reašká Partapuoli.
– Jus don logat BoB okta olbmui, ádde go?
– Eanaš olbmot eai dieđe maid dát bustávat mearkkašit, muhto olbmot mu birrasis Oslos áddejit mu. Go guokte olbmo álggaheaba geavahit dákkár sániid, de álget earát maid geavahit daid, muitala Partapuoli.

Ja go sudno skihpárat leat jo álgán geavahit dáid sániid, ja son doaivu ahte earát maid čuovvolit sin.

–Mus eai leat hirbmat stuorra vuordámušat dása, ahte šaddá dábálaš miehtá máilmmi - muhto gii diehtá, reašká Partapuoli.