NRK Sámi rádio-studios lei buorre mokta Máze ohppiid gaskka, go gulle ahte sii leat nagodan eksámengažaldaga riekta vástidit. Ja nu maiddái šadde sii dán jagáš Dieđát go vuoitit.
Eksámengažaldat lei: Mii lea Paulus Utsi dovdoseamos dikta, mii maiddái lea heivehuvvon lávllan?
Dán diđii Máze skuvlla oassálastti Mina Helene Eira, ja sihkkarastti ahte Máze ii masihan čuoggáid maid ledje lasihan dan maŋemus vuorus.
Dieđát go 2015 finálisttat ja oahpaheaddji guoktá. Badjin: Klemet Utsi, Johan Ailu Eira, Mina Helene Eira, May Cecilie Eira. Vuollin: Inga Anne Marit Juuso, Nils Olaf Eira, Mahtte Ante Sara, Sara Katrine Aleksandersen, Mia Bongo Norvoll.
Historjjálaš Máze
Máze skuvla ii leat ovdal vuosttaš saji ožžon Dieđát go gilvvuin, nu ahte otná gilvu šattai maiddái historjjálaš gilvu.
Máze skuvlla oahppit ávvudit
Guovdageainnu nuoraidskuvla, mii dávjá lea Dieđát go loahppavurrui beassan, oaččui otne nuppi saji Dieđát go 2015 gilvvuin.
Sámi nuoraid čuvges boahtteáigi
NRK Sámi hoavda, Mona Solbakk, guldalii sáddaga fárrolaga oahpaheaddji guoktáin ja sadjásaš oahppi guoktáin. Solbakk oaidná sámis čuvges boahtteáiggi:
– Mun lean sihkar ahte mii oaidnit din boahtteáiggis, duolbmame ja bálgeme sámi máilbmái. Dáid namaid galgat mii agibeaivvi muitit, din namat šaddet erenoamážin Mázes, dadja Solbakk.
NRK Sámi hoavda juohka vuoittuid
Máze skuvlla joavkojođiheaddji ja oahpaheaddji, Klemet Utsi, lei movttet go su oahppit ledje buoremusat.
– Dat lea somá go vuittiimet, go Máze skuvla ii leat ovdal vuoitán, ja ahte dát oahppit de šadde vuosttažin.
