NRK Meny
Normal

Márkkosámi mánáidteáhter

Mánát ohpet márkkosámegiela suopmana teáhteriin.

Markomeannu
Foto: Sergey Gavrilov / Gavrilov Media

Dán geasi Márkomeannu ja Várdobáiki sámi guovddáš ráhkadit teáhtera mánáide, márkomeannu#LÁVDI, masa 8-jahkásaš mánáid rájes gitta 14-jahkásaččaide servet. Teáhtera vuosttaščájáhus lea Gállogiettis Evenáššis suoidnemánu 9. beaivvi.

Mánát besset bargat ámmátbagadeddjiiguin, ja sin prošeaktajođiheaddji ja bagadeaddji lea Beatrice Fløystad.

Sámegielat teáhterbihttá

Mánáidteáhterbihtás lea sihke luohti ja musihkka, ja teáhtera vuolggasadji lea márkkosámi muitalusat ja máidnasat. Máinnas, mii lea dán teáhterbihtá vuođđun, lea ulddaid birra, mat bohtet Gállogieddái.

Bihttá lea sámegillii, muhto ii dárbbaš máhttit sámegiela ovdagihtii ahte sáhttit searvat. Hárjehaladettiin teáhtera geavahuvvo eanaš dárogiella.

Beatrice Fløystad

Beatrice Fløystad

Foto: Ellen Berit Dalbakk / Márkomeannu

Rávvedettiin mánáid dii geavahehpet eanaš dárogiela, muhto ieš dat teáhter gal lea sámegillii. Manne nu ges?

– Dat lea dan dihtii go mii eat hálit baldit daid mánáid, geain ii leat sámegiella eatnigiellan. Ja sámegiella ii leat nu nanus min guovlluin, muhto mii bargat ealáskahttit giela ja nannet giela. Go lea sámeteáhter, de mu mielas galgá lávdegiellan leat sámeiella, dadjá Fløystad.

Márkkosámi mánát neavttárin

Čájáhus lea márkkosámi suopman mielde, ja dat, geat neavttašit leat Skearri ja Skániid guovlluid mánát.

Mo lea dán rádjai leamašan dáinna bargat? Dii álggiidet ovddit vahkkus.

– Jo, mii leat álgán gaskavahku ovddit vahkkus. Dat lea leamašan hui somá, muhto lea maiddái ollu bargu. Mis ii leat nu ollu ráhkkananáigi, ja lea dehálaš dákkár prošeavttain johtilit beassat johtui. Mánát leat nu áŋgirit ja viššalat. Mis lea hui buorre joavku, muitala Fløystad.

Sis leat earet eará maid Simon Issát Marainen ja Åse Kathrin Vuolab mielde dán prošeavttas. Marainen lea ráhkadan luđiid ja musihka, ja Vuolab lea fas regiija-assisteanta ja giehtačálus konsuleanta.

Makkár vuordámušat leat dus alddis dán prošektii?

– Ahte mánát ohppet eanet sámegiela ja dieđusge dan suopmana mii dáppe lea. Lea somá ahte muhtun mánát leat jo oahppan moadde sáni, ja sii besset oahppat eanet go hárjehallet iežaset replihkaid, illuda prošeaktajođiheaddji Fløystad.

Bihttá galgá čájehuvvot máŋgii, maiddái maŋŋá go skuvllat fas leat álgán.