Ánne Márjá Guttorm Graven ja Anne Lene Turi Dimpas ásaheigga dán giđa rádiosáddaga, maid almmuheaba neahta bokte (podcast). Dan namma lea ‘’Sis-Finnmárkku Syndroma’’.
Ánne Márjá lea álo liikon guldalit neahttarádiosáddagiid, muhto go ii gávdnan dan sámegillii, de fertii bargat juoidá dainna:
– Go mun ieš liikonguldalit podcastaid ja go dakkárat eai gávdnon sámegillii, de fertejin ieš ráhkadišgoahtit dakkáriid.
– Mun vuorjagohten Anne Lene mannan čavčča rájes ahte goas moai dal álge dainna, ja viimmat dál giđđat de šattai dát duohtan, muitala Ánne Márjá.
(Artihkal joatkašuvvá vuolábeale dán vuosttaš podcasta maid buvttadeigga – eanet podcastat artihkkala loahpas)
Goabbatge báikkis
Ráhkadettiin sáddaga eaba leat ovtta sajis, muhto goabbatge báikkis. Anne Lene Guovdageainnus ja Ánne Márjá gis Lodegis, ja vaikko vel eaba čohkkáge bálddalaga, de manná bures.
- Loga maid: Movt čállá BRB ja LOL sámegillii?
– Mun láven iežan ruovttukantuvrras čohkkát báddedettiin, ja Anne Lene gis iežas gievkkanbeavdeguoras Guovdageainnus. Mun bádden iežan jiena, ja son bádde gis iežas jiena. Go moai letne geargan de bijan daid oktii, ja almmuhan dan nehttii, muitala Ánne Márjá.
Vaikko dal de orruba goabbatge báikkis, de ii daga dat maidige sudno ságastallamii, go soai leaba mearridan sáddaga guhkkodaga. Dat galggašii leat 45 minuhtta guhku, muhto dássážii eaba leat nagodan doallat dan.
– Muhto moai ean nagot bisánit báljo, nu ahte dál álggos sáddagat leat bistán guhkit go dan maid leimme mearridan. Vuosttaš sáddagatleat buot badjelaš 50 minuhta!
Soai hállaba dan birra maid juohkehaš liiko hállat, omd. servodaga.
– Dat mii suhttada dahje movttiidahttá, nu ahte oaččut árvidit man guhkes neahttarádiosátta munnos lei SlinCraze birra!
–Munnos leat hui eahpeformálalaš ságastallamat, ean leat nu duođalaččat. Leage nu ahte mii buohkat čohkkát soffás ja háleštat dábálaš áššiid birra, muitala Ánne Márjá.
Son lohká maid ahte dát rádiosátta ii heive mánáide, muhto jáhkká dan heivet measta buohkaide.
– Ja lihkus munnje lea Anne Lene psykologa, nu ahte son sáhttá munnje čilget áššiid maid mun in ádde servodagas, muitala Ánne Márjá.
Nubbi podcast
Goalmmát podcast
Njealját podcast
Viđát podcast
