Son lea álo beroštan musihkas, muhto ii álgán ieš ráhkadit lávlagiid ovdal golbma jagi áigi, muitala dan botta go deattaša dihtorsáhpána.

Magne Biti lea Kárášjogas eret, muhto lea jo máŋga jagi orron Oslos.

Ođđajagiruohta golmma jagi áigi lei ávvudeame vilbeliiguin geat čuojahit Felgen Orkester joavkkus, ja jearáige sis maid son sáhttá bargat.

– Nils Mikael smiehtai veahá, ja logai ahte sáhtán álgit DJ:n. Na mun dat gal álgen DJ:n, boagusta Biti.

Kárášjohkalaš lea máŋgii čuojahan Sámis, muhto sus eai leat vel leamašan čuojahanbarggut oaivegávpogis. Ii loga áigut bearehaga márkanfievrridit iežas vel.

– In leat bidjan nu olu návccaid oažžut čuojahanbargguid dáppe Oslos. Áiggun vuos bargat eambbo iežan buktagiiguin ovdal go čajehan earáide movt mun barggan DJ:n, muitala son.

Bidjá olu áiggi musihkkii

Go skuvlabeaivi nohká, de čohkkeda dihtora ovdii, ja čohkká das eahkedii. Son muitala ahte bidjá olu áiggi dása danne go liiko bargat musihkain. Dál leage almmuheame iežas vuosttaš lávlaga man lea ráhkadan Nils Mikael Hætta Hanseniin, guhte čuojaha Felgen Orkester joavkkus.

– Man birra lea dat lávlla?

– Dan nammá lea "Don boađát". Ferte measta guldalit dan. Lávlaga sáhttá dulkot máŋgga láhkai, muitala.

Máŋga doaimma

Magne lea Teknihkalaš fágaskuvlla elfápmooahpus. Dát lea lassioahppu su elektrihkkárbargui.

Son ii vel dieđe áigu go dušše bargat musihkain maŋŋel go geargá oahpuin, ja čilge ahte musihkkamáilmmis ferte dovdat rievttes olbmuid geaidda čajeha iežas musihka, muhto sáhttá máiddái fáhkkestaga šaddat stuorra beakkalmassan.

– Mus leat gal olbmot geaiguin sáhtán gulahallat, muhto in hálit geavahit sin dušše geavahan dihte. Juste dál barggan musihkain danne go lea somá, loahpaha son.