NRK Meny
Normal

– Issoras dat lei!

Dan muitala Inga Merete Pulk maŋŋá go čađahii iežat eksámenčájáhusa «Jurdagat eahkedis».

Inga Merete Pulk
Foto: Biret Inga Kemi / NRK

Sámi joatkkaskuvla ja boazodoalloskuvla Guovdageainnus fállá čiekŋudeami Sámi musihkka- ja lávde-fágas.

Prográmmafága lea ovttasbargu Beaivváš Sámi Našunálateáhteriin ja mannan bearjadaga lei Inga Merete Pulkas (18) eksámenčájáhus, ja teahterabargit ledje veahkkin hábmemin lávddi, čuovgga ja jiena.

Teahterbihtá namma lea «Jurdagat eahkedis» ja Pulka mielas lei veaháš issoras go eksamenčájáhus lei lávddi alde, iige luohkkálanjas.

– Mun ferten lohkat ahte dat lei duođaid issoras! Erenoamážit go ledje olu olbmot geahččamin, muitala son ja joatká. Muhto go manai nu bures ja olbmot ledje nu duđavaččat, de šattai olu buoret. Dat attii munnje nu buori dovddu.

Inga Merete Pulk

Mannan bearjadaga čađahii Inga Merete Pulk iežas eksamensčájalmasa «Jurdagat eahkedis».

Foto: Sara Ellen Anne Eira / Privat

Ávžžuha fága earáide

«Oh yes!» jurddašii Inga Merete Pulk go Sámi joatkaskuvla ja boazodoalloskuvla Guovdageainnus fállagohte dán čiekŋudanfága.

– Mus lea hui stuorra beroštupmi teáhterii, musihkkii ja diekkár diŋggaide. Nu ahte dát heivii justa munnje, muitala 18-jahkásaš Guovdageainnu nieida.

Ja son ii dárbbašan gal guktii jurdilit go jearralat ávžžuhago earáide dán prográmmafága.

– Dan mun gal ávžžuhan! Jus jurddašat ahte it dieđe áiggožat go neavttašit boahtteáiggis, de goitge ávžžuhan. Go de don fuobmát ahte háliidat go dan vai it don háliit. Das leat goitge nu buorit vásáhusat, don oaččut nu olu ruovttoluotta, muhto šattat ieš maid bargat olu. Mun ávžžuhan dan buohkaide.

Vaikko vel ávžžuhage dán čiekŋudanfágan earáide, de ii leat Inga Merete Pulk sihkar áigu go neavttárohppui álgit.

Inga Merete Pulk ja Svein Birger Olsen

Inga Merete Pulk dá ovttas Svein Birger Olsenin. Olsen lea bagadalli ja lea čállán «Jurdagat eahkedis» bihttá.

Foto: Sara Ellen Anne Eira / Privat

– In mun dál vuos jurddaš dan birra. Soaittán boahtte áiggis, gii dan diehtá. Soaittán ođđa neavttárin álgit Beaivvážii, lohká son ja čaimmiha.

– Mu mielas lei son nu čeahppi neavttašit, dat lei nu erenoamáš. Ja munnje addá dat ođđa movtta dienna lágiin hutkat makkár fáláldagaid mii galgat boahtte áiggis addit dán skuvllas ja mat leat miellagiddevaččat ja mat heivejit buorebut Guovdageainnu servodahkii, muitala Sámi joatkkaskuvlla ja boazodoalloskuvlla rektor Ellen Inga O. Hætta.

Háliida joatkit ovttasbarggu

Svein Birger Olsen guhte lea čállán teáhterbihtá lea maiddái bagadeaddjin Sámi musihka ja lávdi-fágas. Olsen lea duđavaš ovttasbargguin.

– Dát lea leamaš hui ávkkálaš ja buorre. Dat livččii hui buorre jus dát bargu joatkašuvašii nu mo mii leat álggahan dál, muhto sihke Beaivváš ja joatkkaskuvla fertejit háliidit dan. Ja de fertejit maiddái oahpaheaddjit, neavttárat ja teknihkkárat šiehttat mo dát ovttasbargu galgá doaibmat, man oasis ja man dásis.

Ellen Inga O. Hætta

Sámi joatkaskuvla ja boazodoalloskuvlla rektor, Ellen Inga O. Hætta lea duđavaš teahterbihttán.

Foto: Eilif Aslaksen / NRK

– Mun gal jáhkán dan ahte go Sámi Allaskuvla, min skuvla ja teáhter ávkkástallet dan čehppodaga mii dáppe lea de mun jáhkán dat lea hui jierpmálaš, loahpaha Ellen Inga O. Hætta.

Guldal ollislaččat buot jearahallamiid dás: