Niillas Holmberg, Antero Priha, Asko Keränen ja Stefan Kvarnström leat ođđa sámi musihkkajoavku Ylva.

Holmberg deaivvadii trompetisttain Antero Prihain Davvi-Suoma musihkkaturneas 2012:s.

– Mu lassin ledje dievva Mátta-Suoma musihkkárat. Ja das lei earret eará fárus trompetista Antero Priha, ja suinna de háleštin muhtin gaskka ahte sáhtášii muinna ovttasbargagoahtit, dadjá Holmberg.

Bassista Asko Keranen ja ruoŧŧelaš miksejeaddji Stefan Kvarnstrøm bođiiga maid oalle johtilit fárrui.

– Ja de manne groavva báddemat, main stuorra oassi lei improvisašuvdna, Ruŧŧii Kvarnstrøm studioi. De bohte ruovttoluotta bihtáiguin, mat mu hirpmástuhtte, dat ledje nu buorit mu mielas. Jurddašin ahte dát han šaddá albma joavku, muitala Holmberg.

Makkár musihka čuojaha Ylva?

– Dat lea álo hui váttis govvidit makkár musihka, dát lea veahá "house" -lágan musihkka, mas luohti ja trompehta čuojahuvvo. Priha lea jazzmusihkkár, muhto dat ii leat nu čielga jazza trompehtačuojaheapmi dán oktavuođas, čilge Holmberg.

Holmbergas leat máŋga iešguđetge musihkkaprošeavtta ja dadjá sivva lea ahte son liiko dákkár dillái. Son beassá bargat máŋggalágan doaimmaiguin ja lea duhtavaš diliinis.

– Mus lea leamašan hui olu lihkku, mun lean beassan bargat bures ja rivttes olbmuiguin. Jus mun livččen dakkár joavkkus fárus, mii vuovddášii duppal- ja trippelplatinumskearruid ja mas livčče máilbmeturneat jagis nubbái, de gal livččii váttis álgit ođđa joavkkuide, dadjá Holmberg.

Mas dii fuobmáidet Ylva nama bidjat jovkui?

– Ođđajagimánu bealde álggiimet háleštit go áššit álge ovdánit ja prošeakta stuorui buohkaid mielas. Fuobmáimet ahte mii han dárbbašat nama johtilit dása. Iežan beales evttohin muhtin namaid, ja Ylva lei dat evttohus mus, masa dat eará gánddat movttáskedje. Ja Ylva namma boahtá dološ dáru ja Ruoŧa mytologiijas, muitala Holmberg.

Eai duostta dadjat goas vuosttaš skearru almmuhuvvo, muhto soaitá jo dán jagi bealde boahtit.