Vedum: – Vi må ta gjengane på gata

Berre dei siste vekene har det vore fleire skyteepisodar. Samtidig hevdar byrådsleiar Eirik Lae Solberg at det har blitt 133 færre politifolk i Oslo det siste året.

Seinast laurdag då ein person blei skoten gjennom vindauge på ein kebabrestaurant i Smalgangen på Grønland.

Eigaren av restauranten, Ali Issam Kanaan, var på jobb då skytinga skjedde.

– Det var skremmande. Eg veit ikkje korleis ein kan beskrive kjensla når du gjer jobben din, og så følast det plutseleg som om du kan forsvinne ut av verda, ut av det blå.

Ein mann i 20-åra fekk alvorlege skader.

– Knuse pengestraumen

Trygve Slagsvold Vedum er leiar i Senterpartiet og finansminister. Han meiner at regjeringa no prioriterer politiet.

– Det har vore meir pengar inn i politiet, men kostnadene har vore krevjande, seier Vedum til Polisk kvarter.

– Vi må både ta gjengane på gata, men vi må også knuse pengestraumen og ta dei store gutta bak dei som er på gata.

Vedum går langt i å varsle at kan kome meir pengar til politiet alt i år.

– De får sjå når revidert budsjett kjem. Vi skal satse tyngre. Det blir også ein hardare kamp mot narkotika.

– Vippepunkt

Byrådsleiar i Oslo, Eirik Lae Solberg (H), seier han blir bekymra over at det er grove valdsepisodar i byen nesten dagleg.

– Det første og umiddelbare som skal til er fleire politifolk i Oslo. Dessverre går det i feil retning no, seier Solberg til NRK måndag morgon.

Særleg peikar han på at valdskriminalitet mellom barn og unge aukar mykje og at det viktigaste som kan gjerast er å gje politiet meir ressursar.

– Vi står ved eit vippepunkt i Oslo, ein veldig alvorleg situasjon. Enten får vi bukt med kriminaliteten no, elles utviklar den seg og blir enda verre, meiner Solberg.

Han meiner at Vedum og regjeringa bagatelliserer politiet sine eigne tal over kor mykje ressursar dei har tilgjengeleg.