Leiaren for underhuset i den russiske nasjonalforsamlinga, Sergej Narysjkin var raskt ute med å støtte asylsøknaden til Edward Snowden, etter at han offentleggjorde søknaden under eit møte på flyplassen i Moskva i dag.
– Eg ser på Edward Snowden som ein menneskerettsforsvarar, som kjempar for rettane til millionar av menneske i heile verda, sa Narysjkin til den statlege nyheitskanalen Rossija-24 ifølgje NTB.
Narysjkin viser til at Snowden risikerer streng straff dersom han vert utlevert til USA.
– Me har ikkje rett til å la det skje. Så eg meiner Russland bør gi Snowden politisk asyl eller mellombels asyl, seier han.
Betre kandidat enn Obama
Eit anna parlamentsmedlem gjekk denne veka enda lenger i Snowden-støtta, og meinte han burde vere ein kandidat til Nobels fredspris.
– Eg er blant dei som ikkje meiner han bør bli utvist. Eg meiner Snowden er ein stor pasifist. Denne mannen har gjort meir for å fortene Nobels fredspris enn Barack Obama, seier Duma-politikaren Alexander Sidyakin ifølgje den statlege avisa Russia Beyond the Headlines.
Sidyakin har markert seg som ein av dei største Putin-kritikarane i det russiske parlamentet. Han har kritisert russiske styresmakter for å slå hardt ned på protestar, og har utrykt støtte til det kvinnelege punkbandet Pussy Riot.
– Forsvarar grunnlova
Eit medlem av presidenten sitt råd for menneskerettar, Kirill Kabanov, har liknande synspunkt.
– Motiva hans var ikkje materielle. Han har ikkje handla i konflikt med ideologien til USA. Han forsvarar sin eigen grunnlov og demokratiet i USA, sa Kabanov ifølgje Voice of Russia.
Dei russiske styresmaktene har kravd at Snowden må slutte å lekke informasjon som skadar USA dersom han skal få ein sjanse om å bli verande i Russland.
Sjølv om Snowden har søkt om asyl i ei rekkje latinamerikanske land kjem han seg ikkje dit no. På bakgrunn av dette ønskjer han å bli midlertidig verande i Russland.
