Støre: – Vi har gjort ein feil

Det blei høg temperatur då statsminister Jonas Gahr Støre (Ap) møtte til pressetreff etter eit møte mellom den nye stortingsgruppa til Arbeidarpartiet og regjeringsmedlemmane måndag.

Tema på møtet var blant anna utspel frå valkampen som var kutta i forslaget til statsbudsjett.

Støre beklagar, men avviser at dei har loge.

– Det har ikkje vore målet vårt å villeie nokon på noko vis. Men når vi ser det som har oppstått her, det som har blitt kommunisert, så er det grunn til å seie at her har vi gjort ein feil, sa Støre etter møtet.

Blant sakene det er snakk om, er gratis ferjer og nedskriving av studiegjeld.

Dette er saker Senterpartiet som er viktige for partiet, og krev at dei blir tekne inn i budsjettet igjen før dei kan sette seg til forhandlingsbordet i Stortinget.

– No ligg statsbudsjettet i Stortinget. Eg er oppteken av å respektere alle dei fire partia og ikkje begynne å stykke dei om eitt og eitt, sa Støre etter møtet.

Kritikk frå eigne rekker

Kritikarane til det som no er lagt fram, finst også internt i Arbeidarpartiet.

Stortingsrepresentant Trond Giske frå Trøndelag meiner at regjeringa må rydde opp.

– Når vi gav så klare løfter i valkampen, må vi innfri dei i budsjettet, seier han.

Giske får støtte frå Averøy-ordførar Ingrid Ovidie Rangønes (Ap) som blei skuffa og irritert då forslaget til statsbudsjett blei lagt fram.

– Vi er valde av folket. Det er folket som er arbeidsgjevaren vår. vi skal ikkje bløffe eller lyge til veljarane våre.

Ap-veteran Asmund Kristoffersen frå Møre og Romsdal seier han er skaka, og at dette går på tilliten laus for partiet.

– Det vil ta tid å bygge opp att tilliten. Eg meiner dei har snakka usant. Desse pengane må på plass ved første og beste høve, seier han.