Helse- og omsorgsdepartementet har kome med nye karantenereglar.
Smittekarantene på 10 døgn kan erstattast med dagleg testing for husstandsmedlem og tilsvarande nære, skriv Helse- og omsorgsdepartementet i ei pressemelding.
– No avviklar vi smittekarantene. No kan ein heller testa seg dagleg når husstandsmedlem eller nærkontaktar har blitt smitta. Det vil letta situasjonen for kommune og veldig mange familiar, seier helse- og omsorgsminister, Ingvild Kjerkol til NRK.
Ho legg til at desse endringane var varsla 14. januar, men at regjeringa har måtta sikra seg testar slik at dette skulle bli mogleg i praksis.
– No kjem det etter kvart store leveransar av testar, og då avviklar vi smittekarantene for nærkontaktar og husstandsmedlem, seier ho.
Håpar på nok testar
Endringa trer i kraft frå og med midnatt, natt til 26. januar.
Kjerkol opplyser om at ein bør vera i karantene fram til då om ein har smitte i hus, men at ein frå då av kan testa seg dagleg og sleppa karantene.
– Dette vil gjelda for alle som har smitte i nær familie eller har vore i kontakt med ein smitta. Vi avviklar smittekarantene. Ein kan heller bruka daglege testar og sånn sett sleppa karantene. No har vi veldig mykje fråvær i mange sektorar som følgje av karantenebestemmingane, og då er tida inne for å avvikla det, seier Kjerkol.
Helse- og omsorgsministeren har trua på at det skal vera nok testar til å gjennomføra det nye regimet.
– Vi varsla denne endringa 14. januar, så vi har venta på å få store leveransar med testar. Framleis kryssar vi fingrane og er ganske sikre på at desse testane kjem, og at det då skal vera forsvarleg å gjennomføra eit testregime i staden for smittekarantene, seier ho.
I pressemeldinga skriv Helse- og omsorgsdepartementet at kommunar skal tilby gratis sjølvtestar som blir brukte for å erstatta smittekarante.
– Gode nyheiter
Smittetala har aldri vore så høge som no.
Kjerkol seier at det er ei uvisse kring det å fjerna karantenekravet samstundes som ein ser at smittetrenden er stigande.
– Men dei tala vi ser i samband med innleggingar er veldig positive. Vi har sett smitterekordar. På fredag hadde vi nesten 25.000 smitta. Eg snakka med min danske kollega i dag. Dei har 40.000 smitta, men innleggingstala aukar ikkje, seier ho.
– Det er gode nyheiter. Då er det ikkje lenger ein så farleg sjukdom, men ein sjukdom vi toler å bli smitta av, legg Kjerkol til.
Meir som ein influensa?
– Ja, vi håpar det. At dette er vegen ut, svarar ho.
Innreisekarantene blir avvikla
Helse- og omsorgsdepartementet har også valt å avvikla dagens krav om innreisekarantene, melder dei i ei pressemelding.
Dette gjer dei etter anbefaling av FHI, då det ikkje lenger blir sett på som smittevernfagleg naudsynt.
Kravet opphøyrer frå og med midnatt, natt til 26. januar.
– Eg er einig i FHI i at talet på smitta blant dei innreisande utan koronasertifikat er så liten relatert til den situasjonen vi har i Noreg no, at tida er inne for å endra på kravet om innreisekarantene, seier helse- og omsorgsministeren i pressemeldinga.
– Avvikling av innreisekarantene vil bidra til ein raskare opning av samfunnet, med enklare innreise. Dette kan gi positive samfunnsøkonomiske konsekvensar for næringslivet og reiselivsbransjen spesielt, legg ho til.