Laurdag møtte over 90.000 personar opp for å delta i feiringa av pride i Oslo. Mange ønskte å delta og ta byen tilbake, eitt år etter at to menn blei drepne og 23 skadde i ei skyting mot utestadar i Oslo i 2022.
Men etter paraden fekk politiet inn tips om at det var posta fleire trugande og hatefulle kommentarar i samband med ei direktesending frå toget på TikTok.
Politiet valde difor å opne etterforsking, seier politiadvokat Anders Briskodden ved Nasjonalt kompetansemiljø innan hatkriminalitet i Oslo politidistrikt.
– Det var ein del ytringar som retta seg direkte mot deltakarar i paraden. Blant anna med truslar om bruk av vald og andre nedsettande kommentarar om dei som gjekk der.
Kraftig auke
Politiet er avhengige av tips frå publikum for å kunne oppdage hatefulle ytringar på nett.
Det får dei kvar dag.
– Vi oppmodar folk til å melde frå til politiet. Anten ved å møte opp på ein politistasjon, eller ta eit skjermbilete av kommentaren og relevant kontekst, og sende det elektronisk til politiet, seier Briskodden.
Og det er mange som har følgd oppmodinga.
I Oslo blei det i juni i fjor meldt inn 20 saker om hatkriminalitet mot skeive. I juni i år er talet 70 saker. I første halvår i år var det i overkant av 200 saker om hatkriminalitet i Oslo.
– Det vil seie at rundt ein tredel av alle hatkrimsaker i Oslo i år har kome inn i juni, og er retta mot skeive.
Mange unge gjerningsmenn
Briskodden er usikker på kva som er grunnen til auken i melde saker. Det kan hende auka merksemd rundt hatefulle ytringar mot skeive har gjort det lettare å melde frå.
I tillegg meiner han politiet har fått betre kunnskap, både i korleis dei behandlar slike saker og korleis dei registrerer sakene slik at dei blir meir synlege i statistikken.
Anders Briskodden, politiadvokat i Oslo-politiet.
Foto: Amanda Iversen Orlich / NRK– Så kan det også hende at det faktisk skjer meir hatkriminalitet der ute. Men dette er faktorar som spelar saman, seier han.
Nyleg kom politiet med ein rapport om meldt hatkriminalitet i Noreg i fjor. Der viser statistikken at det er særleg ei gruppe som går etter det skeive miljøet.
– Vi ser at ved hatkriminalitet mot skeive er gjerningspersonane gjennomgåande yngre enn ved annan type hatkriminalitet.
Statistikken for i år er enno ikkje klar, men førebelse tal viser noko av den same tendensen, seier Briskodden.
