Nesten 900 personar deltok i undersøkinga, som er publisert i New England Journal of Medicine.
Resultata viser at 18 prosent av dei som valde e-sigarettar som avvenningsmåte heldt seg borte frå tobakk i eitt år, medan 9,9 prosent av dei som valde nikotinplaster, spray og tyggegummi klarte å slutte.
– Det er første gong vi har klart å vise kor effektive moderne e-sigarettar er i røykeavvenning. Dei er nesten dobbelt så effektive som det vi reknar som den beste kombinasjonen av andre nikotinerstatningar, seier professor Peter Hajek ved Queen Mary University i London, som har leia studien til AFP.
Studien viser også at mange av dei som bytta til e-sigarettar heldt fram med å dampe etter at eitt år var gått.
Ny metode
Tidlegare undersøkingar har ikkje kome fram til same resultat. Men der ein tidlegare har delt ut produkt testpersonane skal bruke i røykeavvenning, har dei denne gongen sjølve fått setje saman ein kombinasjon av anten nikotinerstatningar eller e-sigarettar.
Det er ein styrke ved denne undersøkinga, seier seniorforskar Karl Erik Lund ved Folkehelseinstituttet til NRK.
– Dei som bruker e-sigarettar treng ofte tre månader på å finne det nikotinnivået, smaken og batteristyrken som funkar best. Måten denne undersøkinga er lagt opp på ligg nærare på korleis ting er i den verkelege verda, og det kan vere ein grunn til at dei har fått det resultatet dei har fått.
Lund har forska blant anna på bruken av e-sigarettar i Noreg. Han seier undersøkinga viser noko norske brukarar har peika på lenge, og er ikkje uroa over at så mange held fram med å dampe e-sigarettar etter å ha kutta tobakken.
– E-sigaretten har ein skadegrad på om lag fem prosent av sigarettrøyking. Mange av dei som byter ut dei tradisjonelle sigarettane med e-sigarettar, er ute etter både risikoreduksjonen og det å framleis kunne nyte nikotin. Dei har ikkje eit mål om å bli nikotinfrie. Røykarane døyr ikkje av nikotinen, men av tjære, kullos og andre gifter.
Vil ha smaksregulering
Men e-sigaretten slår også godt an blant unge.
I USA auka bruken blant elevar på vidaregåande med 78 prosent frå 2017 til 2018, skriv AFP. Det uroar styresmaktene som no vurderer å redusere talet på smakar for å gjere e-sigaretten mindre attraktiv for ikkje-røykarar.
Men Lund meiner det er ein dårleg idé, og meiner vi må sjå den helsegevinsten det gir at røykarar går frå sigarettar til e-sigarettar opp mot faren for at unge ikkje-røykarar startar å røyke.
– Det å gå frå sigarettrøyking til e-sigarett har ein formidabel helsegevinst for røykarane. Det å begynne med e-sigarettar for unge ikkje-røykarar vil berre føre til ein liten risikoauke. Difor må svært mange ikkje-røykarar begynne med e-sigarettar for å utlikne helsegevinsten frå kvar røykar som bytter ut sigarettane med e-sigarettar.
- Les:
- Les:
Ifølgje Lund viser statistikken til Folkehelseinstituttet at 97 prosent av dei som begynner med e-sigarettar er røykarar, medan tre prosent ikkje røykte frå før.
Han meiner difor det er viktigare med tiltak som kan få røykarar til å bytte til e-sigarettar enn tiltak som hindrar ikkje-røykarar å begynne med e-sigarettar.