Støre sin straumplan: Fastprisavtalar på 40 øre/kWh

Åslaug Haga, leiar i Fornybar Noreg

Det er forståeleg at regjeringa tar grep for å skape meir føreseielegheit for straumkundane. Forhåpentleg vil låge fastprisar skape meir ro i kraftdebatten framover. Vi vil likevel understreke at noregspris vil svekke motivasjonen for straumsparing i periodar med anstrengd kraftforsyning, for eksempel i år med lite nedbør til vasskrafta og kaldt vêr.

Bård Ludvig Thorheim, energipolitisk talsperson i Høgre

Det er fleire av tiltaka her som vi støttar og synest er bra. Men vi saknar meir tiltak for å jamne ut prisforskjell mellom bedrifter. Dei fastprisavtalane som bedrifter har tilgang til i dag er veldig rigide og særleg på Sør-Vestlandet må det meir til. Så heng ikkje argumentasjonen frå statsministeren saman når EU-pakka er viktig å innføre, men han går berre vidare med ein liten del av det

Marius Holm Rennesund, kraftanalytikar og partnar i Thema

– Ein får mindre insentiv til å minske straumforbruket. Kor attraktiv avtalen er, avheng av kor i landet ein bur.

– Ville du inngått henne?

– Eg har ei hytte, der ville eg inngått henne. Eg er litt usikker på om eg vil ha det på huset. Eg må rekne på det.

Sveinung Rotevatn, Venstre

Det er interessante initiativ som vi har ei positiv grunnhaldning til, men det er paradoksalt at statsministeren har prata så mykje om kor viktig samarbeid med Europa og EU er, samstundes som dei no vil kutte kablar til Danmark og samarbeide mindre om straum. Venstre vil samarbeid meir med nabolanda våre og EU om å få ned straumprisen, bygge fornybar energi og kutte klimagassutslepp.

Marit Arnstad, Sp

Arbeidarpartiet sin nye straumpolitikk tek ikkje tak i problem med marknaden godt nok, men berre symptoma. Det seier Sp sin gruppeleiar på Stortinget, Marit Arnstad:
– Det er å pøse milliardar ut av statskassa for å reparere på eit system som vi meiner er grunnleggjande dysfunksjonelt.

Hanne-Berit Brekken (Ap), ordførar i Aure kommune

Eg har sjølv jobba med ulike tiltak i straumpolitikken gjennom vervet mitt i programkomiteen, og det er svært tilfredsstillande at vi kan lansere kraftpolitikk som sikrar låge og stabile straumprisar for hushalda. Nettleiga er også ei betent sak, så det å redusere den ein også viktig. Eg er også svært glad for at vi er tydelege på at det ikkje skal komme nokon nye utanlandskablar dei kommande åra.

Arnar Kvernevik (Ap), ordførar i Gloppen kommune

Dette er i sum gode tiltak som vil gje folk betre føreseielegheit og lågare kostnader. Det er viktig at gjennomføringa skjer raskt og på ein måte som sikrar reell effekt for både hushaldningar og næringsliv. Samtidig inneber forslaga at det er rom for å sikre varig låge straumprisar, styrke norsk kraftforsyning og skape ein kraftmarknad som jobbar til fordel for forbrukarane.

Ingrid Ovidie Rangønes (Ap), ordførar i Averøy kommune

Nå kan folk velje sjølv om dei vil ha fastpris eller straumstøtte, alt etter kva som gir best utteljing for kvar enkelt. Momskuttet håpar eg fortset, og at vi fort kan komme ned på null. At det ikkje er aktuelt å gå vidare med dei siste direktiva i EUs energimarknadspakke, seier seg sjølv. Desse varetar på ingen måte norske interesser.

Kjell Ingolf Ropstad (KrF), 2. nestleiar i Stortingets Energi- og miljøkomité

Det har nå gått tre og eit halvt år med høge og svært varierande straumprisar, spesielt for Sør-Vestlandet. At regjeringa først nå kjem med eit slikt grep er jo smått absurd. Makan til innrømming av feilslått politikk skal ein leite lenge etter!

Ingrid Liland, nestleiar i Miljøpartiet Dei Grøne

Det er heilt hårreisande at vi enda ikkje har fått ei storsatsing på energisparing som gjer at folk får lågare straumrekning. Staten burde bruke minst like mykje pengar på etterisolering, varmepumper og solceller på tak som vi bruker på straumstøtte.

Roald Aga Haug (Ap), ordførar i Ullensvang

Det er betre enn eg hadde forventa. Ikkje minst i vårt prisområde er dette veldig bra og viktig. Eg jublar for dette initiativet.

Marius Arion Nilsen, Frp

Framstegspartiet er grunnleggjande positive til dei straum-tiltaka som regjeringa la fram i dag.

– Men det er forunderleg å sjå at Arbeidarpartiet måtte sparke Senterpartiet ut av regjering før dei kom med tiltak. Vi har etterlyst dette i fleire år, seier Marius Arion Nilsen (Frp), som sit i Energi- og miljøkomiteen på Stortinget.

Kirsti Bergstø, SV-leiar

Dette lovar godt for samarbeidet på raudgrøn side framover. Ved å nærme seg SV og Senterpartiet i kraftpolitikken, viser Arbeidarpartiet at det er på raudgrøn side moglegheitene ein tryggare kvardag for folk ligg. På høgresida er det jo total splitting mellom dei store partia i kraftpolitikken.

Trond Hagen, styreleiar i Hytteforbundet

Valflesk, kallar eg dette. Men det er gode nyheiter for hyttefolket, det er det ikkje tvil om. Sånn som det ser ut, i alle fall. Eg kan ikkje seie korleis det blir effektivt. Men ut frå det eg kan sjå, er dette positivt, at vi også kan få ein fastprisavtale. Og eg vil tru at ganske mange hytteeigarar vil slå til på det.

Sofie Marhaug, nestleiar og energipolitisk talsperson i Raudt

Det er ein fadese at regjeringa har venta så lenge med å lanser nye tiltak for lågare og meir stabile straumprisar. Det er bra med fastprisavtalar for hus og hytter, ein gong etter valet, men ordninga går ikkje langt nok. Når noko verkar for godt til å vere sant, så er det som regel ikkje sant.

Are Tomasgard, LO-sekretær

Fastpris på straum og redusert moms på nettleige gjør at dette er ein treffsikker pakke, som vil sørge for at folk kan få føreseielegheit for straumutgiftene sine. Vi er glade for at regjeringa nå seier nei til å planlegge nye undersjøiske kablar. Så har vi forventningar om at man ikkje berre lar vere å bygge nye kablar, men heller ikkje fornyar de kablane til Danmark kor konsesjonen utløpar nå.

Kjell Bjørgum (Ap), ordførar i Aurland kommune

Dette var ein kraftpakke frå Ap! Veldig bra at dei også gjer noko med nettleiga. Fastpris til innbyggjarane er noko me i Aurland har tilbode lenge.

Jan Ludvig Andreassen, sjeføkonom i Eika

Fastprisavtale på straum er eit stort steg i rett retning. Inflasjonen blir meir stabil. Eg trur folk blir meir avslappa til kraftkablar, om dei veit at det ikkje påverkar deira pris. Det vil hjelpe oss alle med å senke skuldrene. Livet blir litt enklare. Eg trur dette er veldig klok politikk,

Karoline Andaur, generalsekretær i WWF Verdsnaturfondet.

Støres fastprisavtale legg opp til at norske forbrukarar vil sette verdsrekord i straumsløsing. Utan insentiv til smart straumforbruk, som lading av elbil på natta, må Noreg bygge ut meir kapasitet enn nødvendig.

Leif Jarle Espedal (Ap), ordførar i Fjaler kommune

Positivt med fastpris og momskutt. Det vil bidra til at husholdningarfår ein meir føreseieleg pris som vil vere lik uavhengig av kor i landet ein held til. At ein og seier at sjølvråderetten ikkje skal svekkast er bra.

Tina Bru, nestleiar i Høgre

Det er lite hjelp å spore her for næringslivet, som trass alt er mest utsett for svingingane i prisane sidan dei ikkje får straumstøtte. Pakken til regjeringa manglar ei handsrekking for å jamne ut den ulempa det er å vere bedrift på Sør-Vestlandet.