– Skulle vi ringt tilbake, ville vi ikkje fått gjort noko anna

– Dersom vi høyrer at det er nokon i andre enden, så ringjer vi tilbake eller prøver å spore samtalen. Har vi mistanke om at det er noko alvorleg, så sender vi ein patrulje, seier Martin Strand, leiar for Operasjonssentralen ved Oslo politikammer.

Han fortel at det kjem inn mellom 12.000 og 13.000 samtalar til 112-sentralen i Oslo kvar månad, og at det store fleirtalet, 75 prosent, er anten feiloppringing, tulletelefonar eller lommeoppringingar.

Mange manglar respekt for naudtelefonen, meiner han.

Stille i andre enden

Oppringinga frå telefonen til Galina Sandeva kom altså inn under kategorien lommeoppringing. Då er det ingenting i andre enden, ingen lydar som kan gi ein peikepinn på om at det verkeleg er ein naudsituasjon.

Ei lommeoppringing skjer når telefonen ligg i ei lomme eller veske og ringjer opp naudnummeret 112 utan at nokon har gjort det bevisst. 112 er det einaste nummeret som kan ringjast til når telefonen er låst, og er derfor ekstra utsett.

– Samtalen frå telefonen til Galina Sandeva var lik svært mange andre slike telefonar, der det ikkje er noko i bakgrunnen. I slike tilfelle ringjer vi ikkje tilbake. Skulle vi gjort det, ville vi ikkje fått gjort noko anna, seier Martin Strand.

• Les: Politiet med nye bilder av Galina Sandeva - håper på flere tips
• Les: Oppringinga frå telefonen til Galina Sandeva

Liten nedgang

Han opplyser at det har vorte litt færre lommeoppringingar etter at stadig fleire har fått smarttelefonar, som har ein teknologi som hindrar oppringingar når telefonen er låst. Tidlegare var opptil 80 prosent av telefonane til 112-sentralen ikkje reelle.

Han fortel også at det er mogleg å ringje 112 også utan simkort, og at det er mange born som gjer det når dei leikar med gamle telefonar.

– Dei finn raskt ut at det er nokon som svarar i andre enden når dei ringjer, seier han.

Det er også mange som ringjer 112-sentralen når dei heller burde ha ringt det vanlege nummeret til politiet, 02800.

• Les: Politiet var i kontakt med drapsoffer
• Les: – Mange prostituerte i Oslo er redde nå

Får ikkje tak i drosje – ringjer politiet

– Vi opplever at det er lite forståing blant enkelte for kor viktig naudtelefonane er. Det er ikkje få telefonar vi får frå folk som ikkje får tak i drosje, ikkje minst no i julebordsesongen, seier Strand.

Han opplyser at dei fleste andre landa i Europa har ein feilprosent på oppringingar omtrent på det same nivået som her i landet, altså 75 prosent.

• Les: Politiet: – Drapet var brutalt
• Les: Metlid: – Vet mer om drapet enn vi går ut med