Stor oppslutning om pride-toget

– Ein fantastisk dag. Det er eit veldig bra oppmøte, og fleire påmelde enn tidlegare, seier Lisa Mari Sæter. Ho er leiar for Ålesund Sentrumsforening som arrangerer Ålesund Pride.

Ho seier pride-toget er høgdepunktet i ei tettpakka veke, der også mange tilreisande er med.

Flaggdebatt

Det er åttande året det er Pride i Ålesund. I fjor deltok 1500 i toget, etter ein heftig flaggdebatt i Ålesund. Toget tok stor plass i gatene også i år.

– Kamp og feiring

Per Kåre Blomvik er leiar for FRI i Møre og Romsdal. Han er glad så mange har kome for å delta.

– Vi må skape eit trygt og godt samfunn for alle. Vi ser at mange skeive mister rettane sine internasjonalt.

Samtidig seier han det er gledeleg å kunne feire saman med mange andre.

– For oss er dette både ein viktig kamp og ei viktig feiring. Akkurat no er vi i feiringsmundus, seier Blomvik.