Frå tett kratt til klar retning med ryddesag

John Magnus Solem svingar saga som ein proff, trass i at han berre har vore på jobb i ei veke.

– Oppgåva er å fjerne lauvskog slik at granplantene får vekse, seier han.

Han er éin av rundt 600 ungdommar som har fått sommarjobb via JOB: U, eit prosjekt der unge deltek i rydding og pleie av ungskog i tre veker.

Sidan starten i 2021 har prosjektet til Skogselskapet og Velg Skog vakse, og i år blir det gjennomført i 10 fylke. Her i Sunndalen er det nordmørsgruppa som er ute i eit plantefelt.

Ryddar for gran – og rekrutterer for framtida

Målet med prosjektet er todelt: Å sikre god vekst for granplantene og å rekruttere framtidas skogsarbeidarar.

– Vi ønskjer å satse på gran. Då kan vi ikkje ende opp med bjørkebestand. Da har vi bomma, seier Andreas Furnes Fjærli, prosjektleiar for JOB: U i Møre og Romsdal.

Skognæringa har eit aukande behov for arbeidskraft. Derfor har myndigheitene og skognæringa gått saman om å finansiere desse sommarjobbane i håp om å rekruttere fleire unge til skogsdrift.

– For 30 år sidan kom ungdom og spurde om sommarjobb. Då slang du til dei ei ryddesag og sende dei ut i skogen. Men slik er det ikkje lenger, seier Tarald Thorshov, skogbruksrådgjevar i Sunndal kommune.

Hardt arbeid og synleg resultat

Alle deltakarane i prosjektet får opplæring før dei startar, og kvar gruppe har ein arbeidsleiar som kjenner både terreng og oppgåver godt.

Resten lærer dei gjennom erfaring.

– Når ein held på i sju timar om dagen, så blir ein sliten. Då gjeld det å ha med seg nok brødskiver til lunsj, seier Ingvar Ulvund.

– Kva er det beste med jobben?

– Å sjå framgangen. Då vi kom hit, var det heilt overgrodd. Men etter at vi har rydda, ser du kor opent og fint det blir, seier Brage Holten Kvalvik.