Oljenæringa stikk av med unge elektrikarar: Fryktar mangel

– Eg må seie eg er litt nervøs ja. Dette er første gongen for meg, seier Ola Waagen Antonsen.

Han har på seg slike snabelaktige sko som våghalsar klatrar i straumstolpar med. 17-åringen får prøve seg som ein del av ein sjarmkampanje.

– Treng folk

I nabobygget får andre elevar på elektrofag på Kristiansund vidaregåande skule prøve seg på ulike kursar. Neas-konsernet, med 117 år lang historie, skal overtyde 17-åringane om at dei bør jobbe for dei.

– Vi treng lærlingar, og vi treng energimontørar og elektrikarar. Så her viser me fram og lar dei prøve seg på ulike oppgåver, seier Annicken Hjelle i Neas-gruppa.

Men ikkje alle lét seg overtyde umiddelbart.

– Eg er splitta, og tenker mellom automatisering og kjemi og prosess, seier førsteklassingen Tor Sindre Kleivmyr Garshol.

Kompisen Sivert Leander Karlsvik legg nok kursen mot automatisering.

Og det er litt av problemet i bransjen.

Smarte hus

For unge elektrikarspirer hamnar gjerne der. Eller reiser offshore, eller stader med turnus.

Dermed blir det færre som kan fikse for oss som slit med ein gåen taklampe eller varmepumpe.

– Mange sit nok med inntrykket av at elektrikaryrket er det same som for 30 år sidan. Det er det ikkje, seier Stein Hendnes i Neas.

Derfor sel dei inn dei meir moderne oppgåvene elektrikar i dag har.

– Ny teknologi, smarthus og grøne løysingar står høgt på menyen, seier han.