- Bakgrunn:
Etterslepet på fylkesvegane er enormt, men over ein tiårsperiode vil regjeringa no løyve 17,5 milliardar til vedlikehald og utbetring.
– Grunnen er at vi vil byggje opp om fylka sine moglegheiter til å betre fylkesvegnettet. Fylka har vist seg som ein god vegeigar, og har satsa godt.
– Men det er påvist at det er eit stort forfall, og for å setje fylka i betre stand til å takle det har vi lagt inn 10 milliardar i ein vegpakke. I tillegg har vi lagt inn 7,5 milliardar til rassikring, som også betyr utbetring av vegstandard.
Det fortel kommunal- og regionalminister, Liv Signe Navarsete.
Mange fylke har klaga
Ho er for tida på Loen i Sogn og Fjordane, der Senterpartiet held landsmøtet sitt.
– Det store etterslepet er ei utfordring mange fylke har peikt på. Derfor kjem vi fylkeskommunane i møte ved å legge dette inn i NTP.
– Totalen for landet viser eit etterslep på 55 milliardar kroner. Monnar 10 milliardar då?
– No må vi hugse på at det i botn ligg ganske mange milliardar som fylka sjølve brukar på fylkesvegane. Både til investering og drift, noko som sjølvsagt er med på å utbetre vegane år for år.
– Så det er ikkje berre desse pengane som blir brukt. Men dette blir eit godt tilskot til det ansvaret fylka har innanfor eigne rammer, meiner Navarsete i prat med NRK.
Fordelinga ikkje klar
Nokre fylke i Noreg har større etterslep enn andre, der Møre og Romsdal og Sogn og Fjordane peikar seg ut som verstingar. Korleis midlane skal fordelast mellom fylka er ikkje klart, opplyser Sp-leiaren.
– Vegdirektoratet jobbar med fordelinga. Der vil både vegstandard og folketal spele inn på fordelingsnøkkelen. Det blir ei fordeling der alle fylke skal få sin del.
Dei 17,5 milliardane skal løyse noverande problem.
– Blir det viktig med årlege løyvingar for å ikkje skape nye problem?
– Det aller viktigaste framover er at vi også i framtida får ei regjering som satsar på kommuneøkonomien og aukar rammene, slik vi gjer, seier ein minister i valkampmodus.
– For innanfor dei fri midlane, som kommunane og fylkeskommunane får, skal ein finne løysingar for vegnettet.
Ikkje imponert
Statens vegvesen har kartlagt at det trengst mellom 45 og 75 milliardar kroner for å dekkje forfallet på fylkesvegane.
Satsinga kjem dermed ikkje til å dekkje vedlikehaldsbehovet, og opposisjonen er ikkje imponert, skriv NTB.
– Regjeringa lar vegane i Noreg forfalle. Dei har fått eit fagleg råd frå Vegvesenet om at her trengst tildelingar på opp mot 75 milliardar kroner, men alt dei gir er 17,5 milliardar kroner, seier leier av Stortingets transportkomité Knut Arild Hareide (KrF) til TV 2.
Regjeringa legg fram forslaget til Nasjonal Transportplan for perioden 2014–2023 den 12. april, og mange store prosjekt er allereie lekne.
Mellom anna skal E39 bli ferjefri innan 20 år, 1 milliard kroner skal gå til skipstunnel ved Stad i Sogn og Fjordane og nesten 4 milliardar kroner skal brukast til å elektrifisere jarnbanen i Trøndelag.
