Tilbake på heimebana etter tre månader: – Det er stort

På Nordmøre stadion har dei jobba på spreng for å få bana klar til eliteseriekampen mot Haugesund søndag.

Det er no tre månader sidan Kristiansund ballklubb spelte kamp på eiga heimebane.

Da dei i juni skulle skifte banedekke herja vinden på Nordmøre. Det førte blant anna til at varmekablane som var lagde blei øydelagt.

Jobben med å legge nytt dekke blei derfor både større og dyrare enn det som var planlagt.

– Du besøker nokre kjellarar du ikkje har vore i på ei stund. Vi har vore uheldige, for det som skulle bli ein liten pause på tre veker i sommar, har no blitt til tre månader, seier Kjetil Thorsen som er dagleg leiar i klubben.

– Vil heim

Men etter å ha trena på andre baner i Kristiansund og spelt heimekampane på Aker stadion i Molde, kunne KBK endeleg ta i bruk si eiga heimebane på fredag under treninga.

– Det er stort. Vi er takksame for dei som har hjelpt oss med baner, men no vil vi heim. Vi vil spele og trene her, sa KBK-trenar Amund Skiri.

Søndag skal dei teste det nye dekket under kamp, for no kjem Haugesund på besøk.

Skiri har store forventningar til kampen.

– Vi må mobilisere litt ekstra til denne kampen når det gjeld innsats, så skal vi få fram spelkvalitetane våre, sa han.

Gler seg til kamp

KBK-supporter Arve Stene er ein av dei som ser fram til å komme tilbake på kamp på Nordmøre stadion.

– Det blir fantastisk å komme tilbake. Eg trur det blir elektrisk stemning, for no er det så mange som gler seg til å komme.

Han er imponert over jobben som er lagd ned på stadion den siste tida.

– Det er fantastisk å sjå kva jobb som har blitt gjort her dei siste vekene, seier han.

Ordførar i Kristiansund, Kjell Neergaard (Ap), hadde også tatt turen for å få med seg KBK si første trening på nytt dekke fredag.

– Det er så godt å sjå at alt er på plass igjen. Det har vore ein tøff sommar, men endeleg skal vi spele her igjen, sa han.

Lover ei betre framsyning

KBK-spelarane gler seg òg. Forsvarsspelar Mikkel Rakneberg lovar også at publikum skal få ei betre framsyning enn det dei fekk sist helg.

Da gjekk dei på eit 1-0-tap borte mot Sandefjord.

– Det skal bli noko anna enn det dei fekk sjå da. Med energien vi får frå publikum, skal vi skal trykke til meir enn det vi gjorde sist, sa han.